Mizoram sorkar hnuaia Economics & Statistics Department-in a lehkhabu buatsaih ‘Village /Locality Profile 2017-2018:Mizoram State’ chu vawiin khan Directorate of Economics & Statistics Conference Hall-ah Planning & Programme Implementation Secretary Dr.C.Vanlalramsanga’n a tlangzarh. Hemi rual hian Planning Secretary chuan lehkhabu dang ‘Village Profile & Development Indicators 2017-2018:Mizoram State (Rural Only)’ tih a tlangzarh nghal bawk.
Vawiin ‘Village /Locality Profile’ tlangzarhna inkhawm hi Economics & Statistics Director Pu Lalchhuanawma Hrahsel-in a kaihruaiin heng data pawimawh tak tak lakkhawm a nih dan leh lehkhabua an siamdan chungchang ‘Technical Report’ chu Economics & Statistics Deputy Director Pu B.Lalrinhlua’n a pe bawk. Village /Locality Profile hi state sorkarin hmasawnna kawng hrang hranga hmalak dan tur atana ruahmanna a siamnaah a hmang tangkai tur a ni a. Tunlai khawvela hmasawnna dan milin India sorkar leh Mizoram state sorkara Planning Department-in vung taka a kalpui mek mitin huapzo hmasawnna ruahman nana duan - Sustainable Development Goals (SDGs) hi State level-ah chuah ni lo, District, RD Block leh Village/Locality level-a tihhlawhtlin a nih theih nan Village/Locality Profile parameter leh baseline data hi a tangkai dawn a. He project hi India Statistical Strengthening Project (ISSP) leh State Fund tangkawpa buatsaih a ni. Khawpui chhunga Veng (Urban Locality) tin leh thingtlanga Khua (Rural Vilage) zawng zawng tuamchhuaka he survey hi beih a ni a. Village Profile hian Sector 13 huamin tehkhawng 240 a nei thung. He Profile hi state sorkarin District level, Block level leh Village/Locality level-a hmasawnna a ruahman nan leh chak taka SDGs a kalpui theih nana chhawpchhuah a ni. Khua leh veng hian eng nge an neih? Eng nge an neih loh? Eng nge an chakna lai? Eng nge an panna lai? An khua leh venga awm tur a awm em? An khua leh venga awm ngei ngei tur a awm lovem? tih zirchian nan a pawimawh dawn a. Mithiamte leh a kaihhnawih sorkar department-te tan SWOT (Strength-Weakness-Opportunity-Threat) Analysis beih nan hmanrua tangkai a tling dawn a ni.
‘Village /Locality Profile 2017-2018:Mizoram State’ chhungah hian Economics & Statistics Department leh MIRSAC, Science & Technology Department tawngkawpa buatsaih ‘GIS-Based Village/Locality Profile 2017-2018’ leh LAILEN Consulting Pvt. Ltd. nena tangkawpa buatsaih ‘Web-Based Village/Locality Profile 2017-2018’ a tel ve ve a. Web-Based Village/Locality Profile-a Download Report (Rural & Urban) kimchang chu mipuite thlir theih turin Department Website www.des.mizoram.gov.in-ah dah a ni ang.
