Mizoram Public  Sevice Commission (MPSC) Mobile Application ‘MIPUSEC’ chu a duh leh mamawh apiang te hman turin vawiin khan MPSC, Mini Examination Hall, New Secretariat Complex, Khatla, Aizawl-ah MPSC Chairman Rev Zosangliana Colney in a tlangzarh.

Hemi puala inkhawm hi Pu K.Lalrinkima, Jt.Secretary, MPSC in a kaihruai a, Technical Report chu he Mobile Apps develop tu JESDA atangin ngaihthlak a ni. MPSC Secretary, Dr.Lalzirmawia Chhangte, in  Dr.F.Chanchinmawia, Chairman JESDA hnenah Document pawimawh leh Completion Certificate a hlan a, Mobile Application tlangzarhtu Rev Zosangliana Colney chuan JESDA te thahnemngaihna leh inpekna avanga a thlawna he Mobile Apps an siam chu lawmawm a tih thu sawiin JESDA leh MPSC thawktute tanrualna avanga thalai hna zawng mek ten awlsam taka hnaruak awm dil theih te an hriat zung zung theihna tur system thar tha a nei chu  thalai leh mipui vantlang tan pawh thil tangkai tak anih ngei a beisei thu a tarlang a. MPSC Mobile Application ‘MIPUSEC’ chu a duh leh mamawh apiang ten an hman turin a tlangzarh a ni.

MPSC Mobile Application hi Android OS Kitkat Version 4.4 atanga Pie Version 9.0 hmang te tana duan phawt a ni a, Google Playstore atangin he application hi download theih tura duan a ni. Hemi apps hmang hian MPSC website ah url chhu kherlo in hnaruak awm te a hriat zung zung theih dawn a, thingtlang kilkhawr zawk atang pawhin he mobile apps hmang hian information awlsam zawka hriat theih tura duan a ni.