Vawiin khan I&PR Conference Hall, Mamit-ah Environment Forest & Climate Change, Mamit Forest Division bultumin National Wildlife Week vawi 64-na lawmna leh chumi puala buatsaih Inter School Quiz Competition neih a ni bawk.

Pu Lalnunsanga Khawlhring, DFO, Mamit-in Key Note Address pein kumtin Theme tha tak neiin Wildlife Week hman thin a ni a. Kan ramah hian sahel ei chi ramsa an ral chak em em a. Sakei thla lak tur takngial pawh a awm tawh lova. Ramsa humhalh kawngah nasa zawka tan kan lak a tul a ni a ti. National Wildlife Week chhungin Wildlife humhalh a tulna hre thar tura kalkhawmte chahin tun kum hnih chhungin India ramah Mizoramin ramngaw kan hloh nasa ber a, ramngawte hi kan mamawh bak kan tiral tur a ni lo a ti bawk.

National Wildlife Week chhung hian Nature Lovers-te chuan Zongaw, Dampa Ngaw, Reiek tlangte tlawh tura sawmin hnam ropui apiangin an ramngaw leh nungchate duat nachang an hriain an ngaihlu thin a ti.

Pu K. Lalmuankima, District Honorary Wildlife Warden pawhin thu sawiin National Wildlife Week hman a lo ngai ta hi Pathianin ama anpui ngeia a siam, thilsiam dangte chunga thunei tura a ruatte'n kan thuneihna kan hman dik loh vang a ni a ti. Nungcha humhalh tih hian tihhlum loh ringawt hi a ni lova, an chenna tur humhalhsak pawh a huam tel a ni a ti. Nakina kan thlah lo awm lehzel turte tana khawvel hi chenna tlak a nih theih nan ramngaw leh nungchate humhalhna kawnga nasa lehzuala hmala turin kalkhawmte a sawm bawk.

64th National Wildlife Week thupui hi "Big Cats - predators under threat" tih niin hemi puala buatsaih Inter Quiz Competition-ah hian pakhatna hi St. Francis of Assisi School, Team B an ni a. Lawmman pahnihna hi JNV School, Mamitin lain Presbyterian English Medium School chu pathumna an ni. Lawmman 1- na hian Rs 3000/-, lawmman 2-nain Rs 2000/- an dawn bakah a tel zawng zawngte tan Participation Prize Rs 1000/- theuh hlan an ni.