Vawiin khan DRO Conference Hall, Mamit-ah 7th Economic Census Training neih a ni a. Dr. Lalrozama, Mamit District Bawrhsap, Chairman, District Level Coordination Committee chuan Training hi a hawng.

Dr. Lalrozama chuan Mamit District chu District hnufual kan nihna atanga chhuak turin Census leh Data rintlak kan neih a pawimawh hle a. Census leh Data nei lo chuan hmasawnna a awm thei lo a ni a ti. Programme tha tak tak siam tur chuan Data dik tak kan neih a ngai a. Data dik lo ai chuan Data awm lo pawh a tangkai zawk a. A dik thei ang bera tih tum turin Training tura kalkhawm Supervisor leh Enumerators-te chu a chah a. Training hlawkthlak tak hmang turin duhsakna a hlan.

7th Economic Census Training hi Remlalruata, District Manager, Common Service Centre Mamit District-in a pe a. Pu Philip Rosiamliana, Inspector of Statistics, Economics & Statistics Department, Mamit pawhin 7th Economic Census atana hriat tur pawimawhte zirtirna a pe bawk.

7th Economic Census-ah hian Enumerators ruat te'n Census Field Work an thawk anga, chungte chu Supervisor tura ruat te'n an vilin an enpui reng dawn a ni.

He hun hi Pu Malsawma, District Research Officer, Mamit chuan kaihruaiin Mamit District chhunga 7th Economic Census-a thawktu tur Enumerators leh Supervisor-te an tel a ni.