Vawiin hian Serchhip Town Sanitation Task Force hmalakna in Serchhip khawpui chhunga Plastic Bawlhhlawh Chharkhawm ni (Mass Plastic Picking Day) hman a ni a. Sawrkar pisa leh zirna in zawng zawng ten anmahni hmunhmaa plastic bawlhhlawh te an tihfai bakah zirlai naupang ten kawngpui dung an thianfai.

Solid Waste Management Rules, 2016 tihhlawhtlinna tura hmalakna kal zelah he hun hi buatsaih niin Town Sanitation Task Force te chuan ruahmanna hrang hrang an siam tawh a. Chung zinga pakhat chu vawiina plastic bawlhhlawh chharkhawm runpui neih hi a ni a. Bawlhhlawh chharkhawm satliah mai nilovin Plastic lam chi thil te chu tihtlem te, hman nawn te leh a tul anga siamnawn (recycle) tura dahkhawm inzirtirna atana hman nghal a ni.

A hawnna inkhawm tawi hi Serchhip DC Office tualah neih a ni a. He hun hi Pi Vanthangpuii, DUDo, Member Secretary, Town Sanitation Task Force in kaihruaiin, Pi Sangchhin Chinzah, DC chu khuallian  ani. Khuallian chuan a hawnnaa kalkhawm zirlaite hmaah, khawvel hi mihringte chen zelna atana buatsaih a tul a, Plastic thil te pawh mamawh hle mah ila min tichhetu atan chuan kan phal tur a ni lo, a ti a. Plastic lam chi thil kan hman te kan tihtlem a, kan duh tawh loh te chu recycle theih tura kan dahkhawm a ngai a, sawrkar pawhin mumal taka Plastic bawlhhlawh te a enkawlna tur hmun a buaipui mek a. Serchhip tana hman tur pawh a hmun tur zawn mek a ni, a ti.

He inkhawmah hian Pi Grace Lalrinfeli, District Manager, DAY NULM kaihhruaiin Plastic bawlhhlawh thehdarh mai mai lo tura intiamna sawi rual a ni.

A hawnna inkhawm ah hian DC Office leh a chhehvel hnaivaia Office te an kalkhawm a, zirna in leh Office hrang hrang ten anmahni hmun theuhvah hnatlang an nei ve bawk a ni.