Lai Autonomous District Council (LADC) hnuaia 5-Lungtian MDC Constituency leh Chakma Autonomous District Council (CADC) hnuaia 9-Ugudasury South MDC Constituency-a by-election neihah vawiin khan tluang taka vote thlak fel a ni.

By-election neihna he'ng MDC bialahte hian zing dar 7-ah vote thlak ṭan niin, tlai dar 5 thleng vote thlak a ni a. Vote thlak hma hian khawl ṭhat leh ṭhat loh enchhin nan mock poll neih vek niin, polling station awm zawng zawngah tluang takin inthlan kalpui hlawm a ni.

Polling station 4 awmna LADC hnuaia 5-Lungtian MDC Constituency-ah voter 1510 an awm a; mipa 606 leh hmeichhia 582-in vote thlakin, vote 1188 (79%) a tla a. Polling station 2 awmna CADC hnuaia 9-Ugudasury 'S' MDC Constituency-ah voter 1544 an awm a; mipa 727 leh hmeichhia 742-in vote thlakin, vote 1469 (95%) a tla thung.

Vote thlak hun khar a nih hnuah polling station tina polling party-te chuan Lawngtlai an pan khawm nghal a. Strong room awmna Lawngtlai DC Office Complex-ah lo dawnsawn tur niin, vote thlakna EVM leh polling material dangte chu felfai taka chhinchhiah hnuah strong room-ah dah luh nghal zel a ni ang.

He by-election-a vote tlate hi June ni 8 (Inrinni) chawhma dar 10-ah a chhiarna tura buatsaih Lawngtlai BDO BNRGSK Hall-ah chhiar a ni ang.