Vawiin khan Lunglei Convention Centre-ah High Powered Committee (HPC), Lunglei member thar te lawmluhna hun hman a ni a. He hunah hian HPC Lunglei in SEDP hnuaia Convergence Scheme a kalpui tur business idea intihsiakna "Leitlangpui Rahbi" chu hawn nghal a ni. He inkhawmah hian HPC Lunglei Chairman Chief Minister Pu Zoramthanga chu khuallian niin HPC Vice Chairman Pu Lawmawma Tochhawng, MLA chu khualzahawm a ni. MLA Dr. K. Pachhunga leh Dr. Vanlaltanpuia te pawh he hunah hian an tel a ni.

Chief Minister Pu Zoramthanga chuan HPC Lunglei term tharin Lunglei district huamchhunga hmasawnna nasa tak a thlen a beisei thu sawiin, mipuiah hamthatna tak tak a thlen theih nan leh mipui thawhchhuah a lo pun belhchhah nan hmalak a nih tur thu a sawi a. Chhimlam hi Mizoram kawtchhuah pawimawh tak pakhat a nih thu leh, ram pawn Myanmar leh Bangladesh atanga buangrua lo luhna tur kawngkapui a nih dawn avangin a la pawimawh zual zel tur thu Chief Minister chuan a sawi a. Kaladan Multi Modal Project kalpui mekah hna thawh hmabak la awm mekte rang thei ang bera chhunzawm a nih theih nan hmalak tum a nih thu a sawi bawk. Pu Zoramthanga chuan ram hmasawnna ngaihtuahtute chuan ramin neih a neih (asset) thlir hmasa in, chumi atang chuan hmalak dawn tur ruahman thin a nih thu a sawi a. Chutiang chuan Mizoram tan pawh asset enge kan neih kan chhut hmasak chuan ram zau tawk tak, ruahtui tha tak, sik leh sa nuam tak, lui thahnem tak, buhfai hectare 70,000 chuang thar theihna hmun remchang, a leiah buh, thlai, thing, mau leh thei rah chi hrang hrang that duhna, a chhunga chengte tawngkhat hmanga inbe thei, sakhaw khat vuan deuh vek a nihna te, lehkhathiam tamna ber state zing a mi leh zilh nuam em em hnam a nihna te hi Mizoram asset, hman tangkai theih turte a nih thu a sawi a. Heng atang hian hmasawn a hausak phah zel tur chuan a chhunga chengten chona ah la thiam in, sawrkarin ruahmanna a siam tawiawmin hma an lak a tul thu a sawi. Chief Minister chuan Mizoram chhunga chengte hian rahbi pawimawh kan nei a ni tiin chaw a intodelh te, kum tam tak hnu pawh a intodelhna atana hman theih tur leh inchawmna atana tha em em Mau hmun zau tak siam a export te, Link road siam te a pawimawh thu te a sawi bawk.

Khualzahawm Pu Lawmawma Tochhawng chuan HPC Lunglei hnuaia hmalakna lo awm tawh thin leh kalpui zel dan tur tlangpui a sawi a. Sawrkarin a khua leh tuite hnenah thawh tur buatsaihin ruahmanna a siamsak chu a tih tur a nih thu sawiin, chutiang ang chuan HPC pawh hi kalpui tur a nih thu a sawi a. Kuthnathawktute leh mi themthiamte tana thar hma, daih rei si te intodelh na atana hmalakna thar ruahman tum a nih thu te sawiin, mi thiamthilneiten anmahni sum hmanga hmalakna an lo din tawh te leh la dinlo te pawh puih ngai leh puih awm tak takte chu thlangchhuak, nasa zawka an eizawnna a lo than a, hlawkna nasa zawk an hmuh theih nana ruahmanna siam tum a nih thu a sawi. Pu Lawmawma Tochhawng chuan HPC chu sawrkarah chuan Planning & Programme Implementation Department hnuaia awm a nih angin sawrkar hmalakna pui ber SEDP zulzuia kalpui tum a nih thu sawiin, mi tuina leh an thiamthil hmanga eizawnna an hmuh theih nana ruahmanna siam chu a tum a ni thu sawiin, a pawisafaia sem a ni dawnlo a ni, a ti. HPC, Lunglei Vice Chairman chuan "HPC hmalakna hlawhtlinna tur atan mipui tan rual a,  thahnem kan ngaih tlan a ngai a ni," tiin mipui thawhpuiah a sawm a ni.

HPC Lunglei ah hian member thar te chu Pu C. Thanseia, Pu C. Lalchhuana, Pu F. Lalsawmkima, Pu F. Lalzarmawia, Pu K. Lalhnema, Pu Lalchhandama, Pu Robert Hmingthansanga, Pu H. Lalthansanga leh Pu Lalrotluanga te an ni.

Chief Minister ho hian HPC Lunglei member tharte chuan meeting hmasa ber Lunglei Convention Centre Conference Hall-ah nei nghal a ni a. HPC, Lunglei hi May ni 28, 2019 khan sawrkarin member te ruatna leh Terms of Reference a tichhuak a. Committee term hi kum nga ni thin kha kum thum chhung a ni tawh dawn a ni.

Vawiina hawn tak Leitlangpui Rahbi hian a tum ber chu mahni kutke a ding tura tumna leh duhna neite, sumdawnna "idea" nei, bultanna tur sum nei silo te tan tana Business Idea hmanga inelna a ni a. He inelnaa titha thlanchhuahte chu sawrkar atangin an sundawnna idea neih tihlawhtling turin engemawchen puihna an dawng dawn a ni.

HPC Lunglei member thar lawmpuina leh Leitlangpui Rahbi hawnna inkhawm hi Dr. C. Vanlalramsanga, Secretary, Planning & Programme Implementation Department chuan kaihruaiin, Dr. Lalrinchhana, Chief Planning Officer, HPC Lunglei chuan member te inhmelhriattirna a nei a. Pi K. Lalrinzuali, Deputy Commissioner & Member Secretary, HPC Lunglei chuan lawmthu sawiin hun a khar a ni. He hunah hian Pu Saihlira, Principal Adviser, Planning Department leh Lunglei a sawrkar department hrang hrang hotute leh khawtlang leh tlawmngai pawl hruaitute an tel a ni.