Commerce & Industries Minister Dr. R. Lalthangliana chuan vawiin khan Luangmuala Industrial Growth Centre leh Zuangtui Industrial Estate tlawhin Industrial Unit hrang hrangte dinhmun leh hmalak dan te a en.

Commerce & Industries Minister hi Aizawl West-I MLA Pu Zothantluanga, ZIDCO Chairman Pu Lalthlengliana, MKVIB Chairman Pu Lalthanliana, ZIDCO Managing Director Pu Lalramsanga Sailo, IRS leh sawrkar mipawimawh ten an tawiawm a ni.

Minister chuan Industrial sector tihhmasawn hi sawrkarin a ngaipawmawh em em a, theihtawpchhuah a tum ani a ti a, Industry kaltlangin Mizoram hmelthar kan lan tir dawn a ni a  ti. Mizoram sawrkar hnuaia Public Sector Undertakings hrang hrangte pawh hna tha taka thawk thei tura tih vul thar leh a ngai a ni a ti a, Industrial Growth Centre, Luangmual  pawh a hmingput ang ngei hian he Centre chhunga Industrial Unit te pawh an thang tur a ni a ti a, Commerce & Industries Department leh PSU te leh Industrial Unit te pawhin ngaihtuahna thar nei se a duh thu sawiin hlawk tham tak tak turin theihtawpchhuah a pawimawh ani a ti a, a ti tha duh tak tak te tan sawrkar pawh a inhawng reng a ni a ti bawk. Industrial Growth Centre a Industrial Unit din tura phalna pek zingah a nihna anga hmanglo an tam chu pawi a tih thu sawiin he Centre kalpui zel dan tur hi sawrkar pawhin a ngaihtuah dawn a ni a ti a, ram neih duh vang ringawta intat lut awmlo se a duh thu a sawi bawk.

Industrial Growth Centre din phalna hi kum 1987 khan sawrkar laipuiin a pe a, Industrial Growth Centre hmun hi Luangmual Local Council hnuaiah awmin a zau zawng hi bigha 766.42 a ni a, bigha 108 a zau ah Industrial Unit din phalna mi 53 pek an ni a, ram la pek theih zau zawng hi bigha 548 a ni a, Industrial unit din phalna an pek zinga hma la lo mi 20 te phalna chu kum 2017 khan tihtawp sak an ni tawh bawk. Industrial Growth Centre chhunga Industrial Unit din phalna pek te hian phalna pek an nih atanga thla 6 chhungin hma an la tan tur a ni a, kum hnih chhungin industrial production an neitur ani bawk.

Minister hian Industrial Growth Centre ah hian lamkhuang kung a phun a, hemi zawh hian Centre chhunga Industrial Unit hrang hrangte an awmna hmunah theuh a tlawh kual a ni.

Industrial Growth Centre a tlawh hnu ah Minister hian Zuangtui Industrial Estate a tlawh leh a, he Estate ah hian Industrial Unit 48 a awm a, Minister hian Industrial Unit thenkhat a tlawh bakah ZOHANDCO hmun hlui Sports & Youth services Department-in Futsal khelmual siamna tura an ruahman pawh a tlawh bawk a ni.

Commerce & Industries Director Pu J. Hmingthanmawia chuan an hmunhma te a hmuna tlawh sak tu Minister an nei chu lawmawm a tih thu a sawi a, heng hmuna Industry neite pawh an thla a muang hle ani a ti bawk.

Industrial Growth Centre, Luangmual chu sawrkar ta ani chungin mimal tuten emaw kiltin atanga an nek thu leh heng hian hmalak kawngah harsatna a siam mek thu sawilan a ni a, Zuangtui Industrial Estate chhungah pawh phalna neilo a in sa mi 33 lai an awm thu leh hun lo kalzel turah pawh harsatna tawh belh zel a hlauhawm thu te, sawrkar ram anih ang ngeia mipuite pawhin zah sak a tul thu te sawilan a ni.