Vawiin khan Zoram Energy Development Agency (ZEDA) chuan mipui hnena Renewable Energy Resources chungchang hrilhhriatna hun MJA Press Club Champhaiah an nei. 

He hunah hian ZEDA hotute chuan Sorkar laipuiin Kawlphetha a kan intodelh theihna tura Solar Plate hmanga mimal,  pawl leh Sorkar Deparment-in Eng an chhit theihna tura ruahmanna a siamte sawifiahna an neih bakah he ruahmanna kal tlanga hamthatna awmtheite Power Point hmangin fiahfai takin an zirtir a ni.

Mipui hnena he ruahmanna sawifiahna leh zirtirna hun hi MJA Champhai District President Pu C. Lalhnunpuia chuan  kaihruaiin,  khawchhak kil tawpa cheng mipui tana Enna thlen thei tur ruahmanna tha kalpui tura ZEDA in zirtirna fumfe tak a neih sak chu lawmawm a tih thu a sawi a.  He ruahmanna tha tak hi a tangkai thei ang bera mipuiten an hman theih nan thawktuten theih tawp chhuah se a duh thu a sawi bawk.

He hun hmanpuitu ZEDA Director Pu David Ramnunsanga chuan Mizoram chhunga he ruahmanna chhawr tangkaitu chhungkaw 127 ten Kawlphetha KW 475 an siamchhuah tawh thu leh tangkai taka hman mek anih thu a sawi a.  Mimal inchunga Solar Plate dah a Kawlphetha siam chhuahna,  sorkar laipuiin senso 90% a tumsak kalpui mek chu kumin June thla ni 29 hian tih tawp rih phawt anih dawn vangin Chenna In nghelnghet nei chhungkua a tam thei ang berin ZEDA kal tlanga dilna thehlut turin a ngen a.  July thla atang chuan Sorkar laipui in sum a tum sak tur hi tih tlem anih dawn thu leh he ruahmanna hi mimal, Pawl leh Sorkar Department building-ah dah theih anih thu a sawi a.  Heng bakah hian Kut hnathawktute thlai chawmna tur tui verh chhuah leh Pump chhuah sakna tur ruahmanna pawh kalpui thuai anih tur thu a sawi bakah Champhai khawpui chhung kawngpui kama Eng (Street Light) tam tham tak dah belh theih anih vangin VC kal tlanga dil theih anih thu a sawi bawk.

He hunah hian ZEDA Assistant Engineer Pu Thantluanga chuan Electric Connection nei tawhten an inchungah Solar Plate dah a Eng an neih theih dan tur ‘Grid Connected Rooftop Solar System’ chungchangah zirtirna a pe a.  ZEDA  Project  Director Pu JH. Malsawma'n Ministry  of  New  & Renewable Energy (MNRE) chungchang leh a hmalakna peng hrang hrangte a sawifiah bawk.   Zawhna leh chhanna hun hman anih bakah sawihona hun hman niin,  mimal, pawl leh Sorkar Department bakah Leilet Zau neituten Champhai an cham laia bechiang a,  dilna thehluh nghal theih anih thu he in hrilhhriatna hunah hian sawilan a ni.

He Awareness Campaign chhim hian District AMFU hruaitute, Tlawmngai Pawl aiawhte,  VC te leh he hmalakna zirchiang duhtute an kalkhawm a ni.