Vawiin khan Directorate of Health Services, Dinthar Aizawl-ah ni hnih awh tur Kayakalp External Assessors cum Swaach Bharat Abhiyaan Master Training tan a ni a, Dr. Eric Zomawia, Mission Director, NHM-in a hmanpui a ni.

Training hawngtu Dr Eric Zomawia, Mission Director, Na­tional Health Mission, Mizoram chuan Damdawiin faina zirho tura kalkhawm an nih anga hun duhawm hmang tlang tur te, dam-dawiin faina leh thianghlimna hian damlo enkawlte damna kawngah nasa takin kori a tu a ni tiin hemi kawnga nasa lehzuala tan lak a ngaih thu a sawi a. Hun kaihruaitu Dr.Lalchhuanawma, State Nodal Officer, Quality Assurance in Kayakalp chungchang a sawizauna a nei a ni. 

National Health Mission hmalakna Kayakalp Scheme hi kum 2015 atanga hman tan niin, tun dinhmunah kan sawrkar Damdawiin ten nasa taka hma sawnin, damdawiin leh a vel te a faiin hmuh an nuam tawh hle a. Hemi hnuaiah hian Sawrkar Damdawiin zawng zawng ten faina kawngah inelna neiin lawmman sem thin a ni a. Kum tin Mizoram chhunga Sawrkar Damdawiin District Hospitals-9, Community Health Centres/ Sub District Hospital-11 leh Primary Health Centres 57 ten faina kawngah nasa leh zuala hma la-in, fai inelna lawmman dawng phak ngei turin hma an la thin a ni.

He trainingah hian Dr Laldinpuii leh Dr Laltlanliani, Consultant, Quality Assurance ten Faina kawnga damdawiin bikin hmalakna tur chi hrang hrang, bawlhhlawh paih leh sawng-bawl dan, toilet enkawl dan, Damdawiin chhunga pindan hrang hrang tihfai dan, thawktute hawihhawm pawimawhna leh Kayakalp Checklist hmanga inendik dan te an zirtir a,

He trainingah hian district tin atangin Chief Medical Officers/ Senior Medical Officers, District Hospital Medical Superintendent leh District Hospital Nursing Superintendent te an tel a ni.