Vawiina Mizoram Fisheries Technical Service Association (MFTSA) General Conference vawi 28-na, Fisheries Directorate Conference Hall, Mizoram New Capital Complex (MINECO)-a neihah Fisheries Minister Pu K.Lalrinliana chu khuallian niin “Mizoramah sangha market a thang nasaa, eizawnna hlawk a nihzia inzirtir tam a ngai,” a ti. He hunah hian Fisheries Secretary Pu Thlamuana chu khual zahawm a ni a, Conference thupui atan “Sangha tam zawk thar chhuah” tih hman a ni.

Pu K.Lalrinliana chuan Mizoram chhungah sangha market a tha sawt hle a, ram dang atanga sangha kan lakluh nasat danah a hralhna tur a vang lo tih a lang chiang hle, a ti a. Sangha leh lui lam sa te hi sa hrisel, zun thlum leh bp sang vei te tan pawha ei ngam a nih avangin a market hi a la thang dawn chauh a ni, tiin sanghaa Mizoram a intodelh theih nana tan lak a tul a ni, a ti. Sanghaa eizawngtute tana training buatsaih thinah sangha khawi dan chauh ni lovin lui dunga sangha leh nungcha dang humhalh dan te, vairam atanga sangha chi lak kher ngai lova Mizoram atang ngeia sangha chi an neih ve theih dan tur zirtir tel turin Fisheries Minister chuan kalkhawmte a chah a. Sangha chauh ni lo chengkawl, kaikuang, chakai leh luia kan hmuh ei tur hrisel tak tak te hi humhalh chunga a man leh hralh dan zawna, kan hlawkpui tlan dan tur ngaihtuah a tul a ni, a ti. Pu K.Lalrinliana chuan Mizoramah Fisheries a lo than a, thawktute pawh hma lam pana chak taka an kal theih nan mithiamte chu ngaihtuahna thar senga kal dan tha zawk duang chhuak turin a fuih a, a tihhlawhtlin kawngah theihtawp a chhuahpui tur thu a sawi bawk.

Khual zahawm Pu Thlamuana pawhin thu sawiin Fisheries-a officer leh staff-te chu an indaihlo hle chung pawha theihtawp an chhuah thin fakawm a tih thu te, taimak chhuah leh thahnemngaih piah lamah fimkhur a tul zia te a sawi a. Lui dunga nungchate humhalh kawnga thawk tha - YMA leh tlawmngai pawl dangte bakah mimalin lawmman an dawn theihna tur ngaihtuahin sawkarin hma a lak mek thu a sawi bawk.

“Sangha tam zawk thar chhuah” tih thupui sawi zautu Pu Lalrochhara, DFDO, Aizawl tarlan danin tuna Mizorama sangha dil awm zawng zawng zau zawng hi 5468 Ha niin dil atanga kum kaltaa sangha thar chhuah zat chu 7013 MT a ni. Serlui reservoir chhut telin Mizoram lui pui hrang hrang te hi 1100 Ha anga chhut a ni a. Serlui reservoir leh lui atanga sangha man hi 400MT vel a ni. Kum kalta chhunga Mizoramin sangha a thar chhuah zawng zawng belhkhawm chu 7413 MT anga chhut niin nikum chhunga Mizoramin sangha a thar chhuah atanga mi pakhatin kum khat chhunga sangha ei tur a neih zat chu 5.7kg a ni. Hetihlai hian mi pakhatin kum khat chhunga taksa mamawh tawk sangha a mamawh zat chu  11 kg a ni a, Mizoram mipuiin kum khat chhunga sangha eitur kan mamawh zat chu 14300 MT a ni.

MFSA General Conference hi an President Pu F.Vanlallawma’n a kaihruai a, Fisheries Director Pu C.Laldawngliana’n thu sawiin an Association General Secretary Pu K.Lalmalsawma leh Pu R.Lalramnghaka ten report an pe a ni.