Vawiin chawhma khan Champhai District Green Mizoram Committee  chu an Chairman Champhai Bawrhsap Dr Naveen Aggarwal, IAS hovin DC Conference Hall, Keifangtlangah an thukhawm a, June ni 11 a Green Mizoram Day 2019 hman dan tur chungchang an rel a ni.

Dr Naveen Aggarwal chuan uar leh zuala thingphun angaih thu leh hemi kawngah hian mitinte thatho leh phur leh zuala   thawhchhuah a pawimawh thu a sawi a. Thingphun chu tun mai nilo nakin zel atana intihhmuh  tana thil duhawm tak anih thu a sawi bawk.

He hunah hian Pu C.Lalbiaka, IFS, DFO Champhai Forest Division, Member Secretary chuan Memberte lawmna thu sawiin, hun chep tak kara meeting ngaipawimawha kalkhawmte hnenah lawmthu a sawi a, meeting neih chhan leh thurel tur tlangpui a sawifiah a. Thukhawm chuan kumin Green Mizoram Day hawnna leh lawmman semna hun leh  hmun chu chawhma dar 11 ah New Champhai Community Hall-ah neih nise a ti a, hawnna neih zawh hnu hian a huhova thingphun hnatlang  Mualbuhvum, Zote Road-a  neih tha tih a ni a.  He mi ni a thingphun tur hian department tin atangin thahnemngai taka thawhchhuah nise a ti a, thing tiak phun reng reng chu tha taka hungna siam tha tih ani bawk a. He hunah hian kangmei ven hapta leh kangmei hluar hun chhunga Khua leh Chanchinbu thawkthate, nikum hnatlanga thingphun nung tha ber department-te  hnenah khuallianin lawmman hlanna a nei dawn bawk a ni.

Vawiin meeting chuan Green Mizoram Day Champhaia hman tur atan Khuallianah Champhai Bawrhsap Dr Naveen Agarwal chu  a ruata, programme kimchang chu Member Secretary kutah dah a ni.   Sawrkar  Department, NGO, mimal leh khawtlang anga mahni ram chhunga thingphun duhte tan Forest Department lamah thingtiak leh a hungna hmanrua ngaihven theih anih thu meeting-ah hian tarlan a nibawk.

Kumin hian Mualbuhvuma YMA ram chhungah  hian Tlaizawng  365 leh Chhakhlei 40, avaiin thing tiak 415  bawr vel phun tum niin, tha taka hung leh YMA nena tangkawpa enkawl zui zel tura ruahmanna kalpui a ni a. Nikum Green Mizoram Day pual khan Mualbuhvumah hianh Thing tiak   215 lai  phun niin, a hungna pawh tha  taka siam nghal   a ni a, Thing tiak phun   za zela 67 hi himdam a ni. Department thenkhat pawhin mahni ramah he ni pual hian thing tiak an phun ve bawk a ni.    

Green Mizoram Programme hi Mizoram sawrkar hmalaknain kum 1999 atanga tan a ni a, hemi hnu hian urhsun takin District hrang hrangah Sawrkar leh NGO tangkawpin a huaihawt chhunzawm thin a, kum 2017 atang khan June Ni 11 hi Green Mizoram Day atana ruat a ni.