Vawiin hian Serchhip District Level Co-ordination Committee on 7th Economic Census chu an Chairman Pi Sangchhin Chinzah, Bawrhsap ni bawk hovin a pisaah an thukhawm a. 7th Economic Census tun thla atanga tana thla thum chhung neih tur chungchang an thlir lawk.

Chairman Pi Sangchhin Chinzah chuan, Economic Census hian sawrkar laipui Welfare Scheme hrang hrang dawng thei turte a nghawng theih avangin, enumerators ten dik leh rin tlak taka Census data an lakkhawm a tul a. Hmaih neih a thiang lova, data diklo dah luh pawh a tha hek lo. Chuvang chuan enumerator te an fimkhurin an rintlak hle tur a ni, a ti a. Serchhip district ah Census fel fai tak a awm ngei theih nan thawktute bakah khawtlang hruaitute leh chhungkaw tinte thawhpuina a ngen a ni.

Meeting ah hian Census atana inbuatsaihna te thlir ho a ni a, kuminah hian a tihdan thar diaia kalpui tur a nih avangin Central lam atangin inbuatsaihna pawh a rawn muang deuh nia sawi a ni. Kumin Economic Census hi Common Service Centre kaltlanga neih tur a ni a, Common Service Centre ten enumerator an nei anga, heng enumerators te hian data te chu mobile phone hmangin an lakkhawm ang a, chu chu Common Service Centre ten online vekin an lo lalut ang a, chutiang zelin thuneitu sang zawkah an thehlut leh dawn  a ni. He Census ah hian  in (house) zawng zawng Geo-tag vek tur a ni dawn a ni.

Vawiin meeting ah hian heng atana hmalakna pawimawh hrang hrangte hi sawikhawm niin hmabak la tih tur awmte umzui dan tur leh mawhphurtu turte ruat fel nghal an ni.