Vawiin chawhma khan Planning and Programme Implementation Secretary Dr C. Vanlalramsanga leh Dr Lalrinchhana, Deputy Adviser cum Deputy Secretary ten Lunglei Government College (LGC) leh  Higher and Technical Institute of Mizoram (HATIM) te tlawhin heng College-a Entrepreneurship Knowledge Cell (EK Cell)-te hnathawh leh hmalaknate an enfiah.

Entrepreneurship Knowledge Cell (EK Cell) hi Planning Department hnuaia Mizoram State Entrepreneurship Development Monitoring Committee (MEDMOC) kaltlanga buatsaih niin a tum ber chu zirlai leh thalai tam zawk ten mahni kutkawiha eizawnna (entrepreneurship) chungchang anlo hmelhriat theihna tura awareness program buatsaih te, entrepreneurship lama kawng kawhhmuh te leh hemi lama workshop, competition leh lecture-te buatsaih a ni a. Planning Department hotute hian LGC leh HATIM College Principal leh zirtirtute kawmin EK Cell kaltlanga an hmalak dan tur leh hmachhawpte sawipuiin entrepreneurship lama zirlaite tha taka kaihruai tur leh zirtirna uluk taka pe turin an chah a. Kumin chhunga Awareness Program, workshop, leh competition te kalpui an tum dan Schedule mumal tak Planning Department-a thehlut turin a chah bawk a ni. Dr C. Vanlalramsanga chuan MEDMOC kaltlangin Mizoram pum huap entrepreneurship intihsiakna te hlawhtling taka kalpui alo nih thin tawh thu sawiin Lunglei District tana intihsiakna ‘Leitlangpui Rahbi’ buatsaih thuai a nih tur thu a tarlang bawk.

Planning Department hotute hi Entrepreneurship Development Scheme hnuaia Lunglei District-a Master Trainer pathum – Pi Agnes L Khawlhring, LGC, Pi C. Lalremruati DIPRO leh Pu Ramnundanga, HATIM ten an tawiawm a ni.