Home Minister Pu Lalchamliana chuan vawiin khan Kolasib District huam chhung Mizoram ramri hrula Police Duty post te chu a hmunah kalin a enfiah.

Home Minister chuan Saiphai khua a Police out post leh a chhaka IR Camp te tlawhin he hmuna Police duty te chuan kawng hrang hranga thawmthat leh hmasawn an ngaihna te an lo thlen a, Building thawmthat ngai, tui dahkhawlna zem siam that ngai leh choka siam that ngai te a enfiah a, hmalak dan tur an sawiho a, duty tur indaih loh chungchangah pawh indah belh turin hmalak chhoh a nih tur thu Home Minister hian a tarlang bawk a ni. 

Home Minister hian Vairengte a ILP endikna counter leh Vairengte Police check gate tlawh bawkin helaia hnathawh kalphung a harsatna awm leh awmloh te zirchiangin ramri hrula awm Ram leh Hnam ven himna kawnga hnathawk te chu inpe zo tak leh rinawm taka thawk chhunzawm zel turin a chah a ni. Hemi bakah hian Vairengte State veng Phainuam peng a Police patrolling post leh sub-jail te tlawh bawkin helai hmun a building dinhmun bakah kalphung te a zirchiang a ni.

Home Minister hi Pu Lalbiakthanga IPS, DIG(NR), Kolasib Bawrhsap Pu Zoengsanga, Kolasib SP Pu Vanlalfaka Ralte leh Sawrkar Official hrang hrang ten an tawiawm a ni.