Vawiin khan LAD Conference Hall, Mamit ah 7th National Voters Day hman a ni a, Pi Lalbiaksangi, District Election Officer, District Bawrhsap ni bawk chuan khuallian niin a hmanpui.

He hun hmanpuitu Pi Lalbiaksangi,District Election Officer chuan Election Commission of India duhdan ang a, Electoral Roll buaipui kawnga hnathawh a ni leh ram chhung hmun dangte rual a National Voters Day hlawhtling taka hman a ni chu lawmawm a tih thu a sawi a. India khua leh tui nih chak, India ram pawn ami tam tak an awm a, heng mite hian dan lo anga India khua leh tui nih an tum a nih pawhin huaisen taka dodal a tul thu a sawi. Hemi kawngah hian Political Party leh Tlawmngai Pawl hrang hrangten mawhphurhna sang tak an nei a ni tiin Electoral Roll a thun an nih loh nana tan la zel turin a ngen.

District Bawrhsap chuan India khua leh tuiten sawrkar atanga hamthatna kan dawn reng reng mihring cheng zat anga siam a nih thin avangin kan chanvo tur ram dang miin min laksak loh nan Roll a inthun kawngah kan fimkhur zual deuh deuh a tul hle dawn a ni a ti. Kum 18 tling chin, Electoral Roll a inthun tura hmalak nachang hre lo tam tak an awm thin a,heng mite zirtir chu khua leh tui dik takte mawhphurhna a ni tih sawiin Electoral Roll a awm tawhte pawhin ram hruaitu thlang tura vote thlak chu an mawhphurhna a ni tih hria a, ngaipawimawh turin a chah bawk.

Pi H. Lalchhandami, Election Officer chuan an hmalakna tlangpui report pein Ni 5/1/2017 khan Mamit District chhung Assembly Constituency pathum a Final Electoral Roll tlangzarhah vote nei mipa 31756 leh Hmeichhia 30665 an vaiin mi 62421 an awm a,hmalakna hrang hrangah hian Inter Branch YMA Quiz buatsaih a nih bakah Mamit khawpui te tan 21.1.17 khan Special Camp neih a ni a, hetah hian election kaihhnawih form 6 & 7 & 8 hmanga case 32 an dawn chu a hmunah chinfel nghal a ni.

He hunah hian National Voters Day puala Essay inziah siak leh Slogan inphuahsiak lawmman sem nghal a ni a, Essay inziahsiak a lawmman dawngtute chu : 1.Vanromawia Govt. Mamit College, 2.Vanlalrohlui Govt. Mamit Higher Secondary School, 3.Vincent Lalruatsanga Zadeng, Mamit Govt. Higher Secondary School te an ni a, Slogan inphuahsiak ah 1. Lalthakima, 2. B. Lalhriatpuia 3.G. Lalthakima te an ni.

Mamit District chhung Assembly Constituency pathum a Booth Level Officer (BLO) tha thlanchhuah an ni a, chungte chu : Hachhek Constituency ah Pu H. Lalfelkima, Bungthuam, Dampa Constituency ah Pu Rodingliana Sailo, W. Phaileng, Mamit Constituency ah Pu B. Lalliankima, Hruaitluang te an ni.

Mamit a 7th National Voters Day hmanna hi Pu H. Lianzela, Addl. DC Mamit in a kaihruai a, Chief Election Commissioner, Dr Nasim Zaidi thuchah, Projector screen hmangin ngaihthlak a ni a, kalkhawm ten thutiam (Pledge) sawirual in Political Party leh NGOs aiawhten thu an sawi bawk.

7th National Voters Day hi Mamit Dstrict chhung Sub-Division leh Block thuthmun bakah Polling Station hrang hrang ah hman a ni.

Pi Lalzikpuii, SDC in kalkhawmte chungah lawmthu a sawi a, National Voters Day puala inkhawm buatsaih chu tih tawp a ni.