3055/2022-2023

Mamit 14th December, 2022 : Vawiin khan DRO Conference Hall, Mamit-ah Annual Training Programme On Civil Registration System for Registration of Births & Death 2022 neih a ni a, Pu Lalnunhlua, District Bawrhsap chuan khuallian niin a hmanpui.

Pu Lalnunhlua chuan Mamit District chhunga RBD te chu an pawimawhna inhre thar tura chahin, ram changkang apiangin piang leh thi an chhinchhiah fel thin a, kan rama statistics felfai tak kan neih theih nan mahni awmna khua theuhah felfai tak leh taima taka hnathawk turin a chah.

District Bawrhsap chuan tunlai khawvelah Birth certificate chu kawng engkimah phut a nih tawh thin avangin a pawimawh hle a, a pekchhuah kawngah engemaw chhuanlam ho te te siama tikhawtlai lo a, a hun taka pe chhuak thin tura chahin, dan hnuaia mipui dinhmun leh harsatna hrethiam tak chunga hnathawk tur leh biak nuam, dawr nuam, mipui tana rawngbawl, mipui tana awm kan ni tih in hrereng turin kalkhawmte a chah a ni.

Pi B. Vanlalrengi, Deputy Chief Registrar & Deputy Director, Economics & Statistics Aizawl pawhin thu sawiin District chhunga RBD te chu mipui tana rawngbawl leh hnathawk an ni tih inhre thar tur leh monthly report ngaipawimawh tura chahin, a hun taka report lut kimlo a awm chuan report khaikhawm kawngah harsatna a siam thin a, midang hnathawk tha pawh a nghawng theih thu a sawi a, RBD te hlawh Rs. 350/- ni thin chu kumin October thla atangin Rs. 500/- ah tihsan a nih thu a sawi bawk.

He hunah hian Pu J. Ramdinmawia, Inspector of Statistics, Pi Lalfakawmi, Inspector of Statistics, Economics of Statistics Department, Aizawl te'n Common Reporting Standard (CRS) chungchangah zirtirna an pe a ni.

Mamit District chhungah Registrar's of Birth & Death hi District Hospital Mamit-1, CHC Kawrthah-1, District chhung PHC - 8 te nen an vaiin mi 80 an awm mek a ni.

Vawiin training hi Pu Lalhmingmawia Hrahsel, Addl. District Registrar of Births & Deaths & District Research Officer, Mamit chuan kaihruaiin, Pu K. Philip Rosiamliana, Inspector of Statistics, Mamit chuan hunserh hmangin, Pu R. Lalchawimawia, Economics & Statistics Department, Mamit pawhin lawmthusawina a nei bawk.