Vawiin khan Government of Mizoram, Women & Child Development hnuaia din, Bethany Solace Home (Swadhar Greh) Mamit Bazarvenga awm chu hawnna leh malsawmna neih a ni a. Rev. Sister M. Joy, Provincial Superior, North East chuan hawngin Most Rev. Stephen Rotluanga, Bishop of Aizawl chuan he home hi malsawmna a nei.

Home malsawmtu Bishop chuan chanchintha puan darh rawngbawlna mai bakah mirethei leh chanhaite dawmkan chu kohhran mawhphurhna anih thu sawiin vawiina Home hawn tak chu hmeichhia belh tur nei lo, dinhmun tleu tawh leh enkawltu mumal nei lo mi chanhai te'n leirem an rah leh theihna tura enkawl turin Bethany Sister-te chu a ngen a. Home a awmte chu mahni ke-a ding thei tura theihtawpa tanpui turin kalkhawmte a sawm bawk a ni.

Home hawngtu Rev.Sister M. Joy, Provincial Superior, North East chuan Bethany Sister-te chu khawtlang tana an rawngbawlna hrang hrangah lawmthu hrilhin hmangaihna leh dawhtheihna nen thahnemngai taka rawngbawl chhunzawm zel turin duhsakna a hlan.

Home hawnna leh malsawmna hunah hian Pu Alan Lalmuanpuia, State Co-Ordinator, NACO leh Pu Dominic Lalnunhlua, Social Welfare Deptt Mamit aiawhte'n thu an sawi bawk.

He Bethany Solace Home (Swadhar Greh)-ah hian hmeichhia kum 18 chin chunglam, dinhmun harsat vanga belh tur nei lote, khawtlang leh chhungkaw dinhmun phet laklawh tawh te, khuarel chhiatna avanga chennaa in nei lote, Jail tang chhuak chhungte belh tur nei lo te, Domestic Violence tuarte, pasalin an mak pan tur nei lote leh HIV Positive, mite'n an thinhrik leh chenna tur mumal neilote tan awm theih a ni dawn a. He home-ah hian kum 3 thleng an awm thei ang a, hmeichhia kum 55 aia upate chu kum 5 thleng an awm thei dawn a, kum 5 hnuah Old Age Home lamah sawn theih an ni ang.

He home-ah hian ei leh in, thawmhnaw leh medical facilities an dawng ang a, counselling bakah legal aid and guidance tha tak pek an ni dawn bawk a ni.

Vawiin Home hawnna hi Sister Reshma, Resident Superintendent, Bethany Solace Home chuan kaihruaiin Sister Dr. Prema Misquith, Project Director, Bethany Social Welfare chuan kalkhawmte chunga lawmthu sawina a nei a. He hunah hian Mamit khawpui chhunga Sorkar Department sawm bikte, khawtlang hruaitute leh tlawmngai pawl aiawhte an tel a ni.