No.2846/2021-2022
Aizawl 2nd November, 2021 : Vawiin khan Govt. Higher Secondary School, Mamit-ah DC Mamit leh MYC hmalakna hnuaia Covid-19 Migrant Workers te tana Livelihood Generation Training neih tur chu Dr. Lalrozama, IAS, Mamit District Bawrhsap chuan a hawng.

Training hawngtu Dr. Lalrozama chuan Training tura thlanchhuahte chu tha taka training tura chahin thil chhiar tur leh zir tur an pek hrang hrangte chu nakina tih tura khek lovin, a hunlaia thiam tuma zir chiang nghal zel turin a chah a. Training duh dil tam tak kara thlanchhuah an nih angin Training tha lo leh Attendence tha lo te chungah pawh a tul anga Action lak a nih tur thu a sawi bawk. Nakin hun thlenga an eizawnna tura athlawn veka Training buatsaih a ni chu lawm nachang hria a, rilru leh tihtakzeta training turin duhsakna a hlan a ni.

Pu Vanlalchhuanga Chhangte, President, Sub.Hqrs.YMA Mamit leh Pu M.S Dawngliana Hnamte, Principal, Gov.t Mamit College pawhin Training tur te fuihna thu an sawi bawk.

Pu B. Lalpuia, Training Co-ordinator chuan Training Course chungchanga hriat tur pawimawhte a tarlang a. Piggery-ah Dr. Malsawmkima Pachuau, MVSC leh Dr. David Lalthlamuana, MVSC te'n zirtirna an pe dawn a. Cement Mistiri Training hi Pu PC Biaksanga, BE Civil, Pu John L. Ngohma, BE Civil, Pu Kiddy TM Rintluanga leh Pu Lalhmingmawia te'n zirtirna an pe thung ang.

Piggery Training hi mi 20 tan Ni 15 chhung neih tur a ni a. Cement Mistiri hi mi 40 tan Ni 45 chhung neih tur a ni. Training te hian Uniform, Stipend bakah training zawh hnua an hnathawhna tur hmanruate athlawn vekin an dawng dawn a ni.

Training hawnna Programme hi Dr. F. Vanlalruata, Member Secretary, Core Team on Skill Development Framework, Mamit chuan kaihruaiin Pu Zodingliana Chenkual, EE, PWD chuan lawmthu a sawi a ni.