Vawiin khan Pi Lalbiaksangi, District Bawrhsap hovin D.C Conference Hall, Mamit-ah kumin Krismas 2016 leh Kumthar 2017 mipui vantlang te’n hlim leh thlamuang taka kan hman theih nana Dan leh Thupek kenkawh dan tur sawiho a ni.

Meeting-ah hian Krismas leh Kumthar vuakveta venhimna kalpui dan tur Dt 10th November thlaa lo rel tawh thlirho zui leh a ni a, Police leh Tlawmngai pawlte chuan Mamit khawpui chhung veng hrang hrangah duty post siam tum a ni a, Dt 24th leh 31st zanah duty hi ngawrh leh zuala kalpui nise tih a ni.

Vawiin Meeting-ah hian Tripur Transit Camp a Reang Bru lakletna tura enfiah hna November thla-a hlawhtling taka neih thlir letna neih niin kumin January thla a laklet hna thawhna tura inbuatsaihna hrang hrangte thlir ho a ni bawk.

Pi Lalbiaksangi District Bawrhsap chuan Reang ( Bru ) Mizoram rawn let turte awmna tura Mamit District chhung village council 51 te’n an huam chhung theuhah ram an pe chu thil lawmawm tak a ni a ti. Meeting hian Reang Bru te Mizorama an lo kir leh huna an awmna tur khua theuhah boruak muanawm tak hnuaia hruaikir hna kalpui a nih theihna turin venhimna lama thawktuten lo tlawh kual thin se tih rel a ni.

Meeting-ah hian Mamit District Jail-a tangmekte hriselna dinhmun enfiah tur Doctor leh Nurse dah an la nih loh avanga harsatna awmte thlirho niin Dt 10 Dec hian Mamit District Legal Service Authority ruahmanna hnuaiah Mamit District Jail-a tang mekte hriselna dinhmun hi Mamit Hospital atangin Doctor leh Nurse te’n an enfiah dawn a ni.