Vawiin khan DC Conference Hall Mamit-ah Pu Ronald Sapa Tlau, MP Rajyasabha hovin District Development Co-ordination & Monitoring Committee (DISHA) thutkhawm a ni.

Vawiin Meeting-ah hian Pu Ronald Sapa Tlau MP Rajya Sabha chuan Mamit District chhunga Sawrkar hnathawkte chu inlungrualna tha tak neia hnathawk tur leh thingtlang kuthnathawktute nitina eichawp zawngte'n hawpkhawp an thar chhuah ngei theihna turin Department hrang hrangte kan pawimawhna inhrethar turin a chah a ni. 

Meeting-ah hian Meeting hmasa bawhzui ngai awmte bawhzui that a nih dan te thlirho a nih bakah Sorkar laipui schemes hrang hrang MGNRES, IAY/PMAY (G) , IWMP, PMGSY, CMO,DEO leh schemes hrang hranga hmalaknate thlirho a ni.

MGNRES hnuaiah hian kum 2017-2018 chhungin Job card nei chhungkaw 20707 te tan ni 100 inhlawhna ni 48 siam tawh a ni a, PMKSY hnuaiah Mamit District chhungah Self Help Group 79 din a ni tawh a, CSC hnuaiah Darlak leh Dapchhuah khuaah te Community Sanitary Complex sak sak an ni a, Bairabi to W. Phaileng Mamit kaltlanga kawlphetha pek hna 132kv line hna kalpui mek chu thawh mek niin check survey tih mek a ni a, chumi zawh veleh chuan electric bante chu hman theih tura peih thuai tura beisei a ni. DDUGJY hnuaiah Mamit District chhunga kawlphetha la hmu lo khaw 12 te eng pek tura ruahmanna kalpui niin heng zingah khaw pali Damdiai, Kolalian, New Eden leh Pajirungpara-te chu eng pek mai theih tura hna peihfel a ni tawh a ni. 

PWD Mamit Division hnuaiah PMGSY kaltlangin Mamit to Phaizau 10.48 km kawngsial hna thawh mek a ni a, group pangaah then niin kawngpui sial hna hi chak taka kalpui chhoh mek a ni. Construction of W. Phaileng to Damparengpui Road 2.13 km chu zawhfel a nih tawh thu tarlan a ni. Mamit District mipuite hriselna dinhmun tarlanah Damdawiin a nau nei 51% niin In lama nau nei hi 49% a ni. Ram changkang tehna pawimawh tak Infant Mortality Rate (IMR) 20 chu hei aia dinhmun tha zawk kan luah theih nan hriselna lama thawktute chu tan la lehzual tura ngen an ni. Kumin chhungin malaria natna vangin Mamit District chhungah mithi kan la awm lo chu a lawmawm hle a, Mamit District Hospitala thisen test mi 411-ah HIV hrikpai mi 2 hmuhchhuah an nih thu tarlan a ni bawk.  

Meeting-ah hian Hachhek Bialtu MLA Pu Lalrinmawia Ralte, Political Adviser to CM, Dampa Bialtu MLA Pu Lalrobiaka, ZIDCO Chairman, Mamit District Bawrhsap Pi Lalbiaksangi, Joint VC Chairman bakah committee Members te an tel a ni.

 

 

Attachment

  • Loading attachment...