Vawiin khan DC Office Chamber-ah Dr. Lalrozama, IAS, District Election Officer, Mamit District Bawrhsap ni bawk hovin Polling Station hrang hrangte kalpawh theih dan kawng dinhmunte thlirin thutkhawm a ni.

Meeting-ah hian Polling Station hrang hrangte kalpawhna kawng dinhmun thlirho niin lirthei kalpawh theih a nih leh nih loh te, lirthei eng chi nge lut thei tih te bakah lirthei luhtlang theih lohna Polling Station hrang hrangte thlirho a ni a. Mamit District huam chhungah Polling Station pangngai 116 awmin heng zingah hian Motor luh lohna ke chauha thlen theihna Polling Station 5 a awm a. Lawngleng emaw ke chauha kal theihna Polling Station 2 an awm thu tarlan a ni a. Fur ruahtui tlak avanga Four Wheel Motor-a kal ngai Polling Station 10 awm anga tarlan a ni.

Meeting-ah hian Polling Officials-te an duty-na hmun tur Polling Station him taka an thlen theih nan leh Polling zawh hnu lamah pawh him taka Strong room an thlen leh theih nan kawng enkawltu, abik takin PWD leh General Reserve Engineering Force (GREF)-te chu an kawng enkawl theuhah leimin, kawng diak leh nalah-te harsatna an tawh loh nan a remchan dan ang anga JCB-te inralrin nise ti-a rel a ni.

Vawiin Meeting-ah hian Addl.DC, PD, DRDA, EE, PWD, Mamit leh Kawrthah Division, Officer Incharge, GREF, BDO, W. Phaileng-te an tel a ni.