Aizawl District Election Officer (DEO) chuan Lok Sabha inthlan 2019 leh Aizawl West-I MLA  Bye-Election-ah hian Person with Disability (PwD) ten vote an thlak theuh theih nan Booth Level Officer-te tan a hnuaia tarlan ang hian hriattirna a chhuah a ni:

1)Inthlan hma ni hian mahni bial theuha PwD voter-te electoral roll-a an hming a chuan leh chuan loh finfiah tur a ni a. Mitdelte tan election pamphlet leh voters guide mitdel hawrawp a chhut semchhuah tura buatsaih a ni a, Presiding Officer kutah emaw DEO Office atangin emaw pekchhuah a ni ang.

2)Poll Day hian bial chhunga PwD voter ten vote an thlak ngei theih nan anmahni phurhna tur motor a awm dawn a, hemi atan hian ruahmanna siam turin BLO-te hriattir an ni a. Motor chungchang hi DEO hnenah ziaka thehluh tur a ni a, motor khalhtu leh neitute party tan bik nei an ni tur a ni lo. Vehicle Movement Plan hi bialtu BDO leh CDPO hnenah pek a ni tawh a ni.

3)PwD Voter hruaikhawm hna Social Welfare Dept leh Anganwadi Worker tangkawpin an thawk dawn a. A tul anga tawiawm turin BLO-te ngen an ni a. PwD ten Poll Day hian thut hahdamna hmun, a chung zar hliah an neih ngei theih nan Polling Official-te leh Anganwadi Worker-te nena ruahmanna siam tura ngen an ni bawk.

4) Polling Official-te Sign Language (kut zaizir tawng) PwD-te pui thei tur zirtir an ni a. Polling Station zawng zawng ah kailawn dan a ni a. Poll Day hian Polling Station-a PwD Voter pui turin Mizoram People’s Forum atangin volunteer 2 tal an awm beisei a ni.