No.7643/2020-2021

Vawiin khan Govt. Mamit High School-ah STAM leh Samagra Shiksha, Mamit District buatsaihin District Level Children's Science Congress neih a ni a. Dr. Lalrozama, IAS, District Bawrhsap chuan khuallian niin he hun hi a hmanpui.

Khuallian chuan Mamit District huap Children's Science Congress buatsaih a ni thei chu lawmawm a tih thu sawiin a buatsaihtute chungah lawmthu a sawi a. Mihringte kan dam khawchhuah nan leh kan nunna turin ei leh bar kan ngaihtuah a ngai a, kan ei leh bar leh nitina kan  mamawh kan dapna kawngah nature tichhe thei lo ber tura kan khawsak thiam a tul a ni a ti. Kan next generation atan kan environment tichhe lo zawnga hmasawnna kan kalpui a tul a, kan mamawh titlem a, a theih ang anga inrenchem a pawimawh a ni a ti bawk. Competition chu rilru thianghlim taka nei tura chahin Children's Science Congress, 2021 thupui chu hrereng a, a taka hmang tangkai chhunzawmtu ni turin a chah nghal bawk a ni.

Pu PC. Lalthangzauva, District Coordinator, CSC chuan Keynote Address pein Children's Science Congress chu Kum 1993 atangin chawl lovin kumtin neih thin a ni a ti a. Kumina Science Congress an buatsaih chu State lam duhdanin School thlanchhuah bikte inelna tur atan chauha buatsaih a nih thu sawiin heta a tithate hian District ai an awh dawn thu leh an tih that chhoh zel chuan State aiawh thlenga an kal theih tur thu a tarlang a ni.

Children's Science Congress, 2021 thupui hi "Science for Sustainable Living" tih niin Mamit khawpui chhunga School pathumte'n inelna an nei a. Lawmman pakhatna hi School pahnih Govt. Mamit High School leh New Mamit Secondary School-in dawngin lawmman pahnihna hi Presbyterian English School-in an dawng ve thung a ni.

He hun hi Pu Lawmawma, District Project Coordinator, Samagra Shiksha, Mamit chuan kaihruaiin Pu Andrew Lalthlanawma, Academic Coordinator, CSC chuan lawmthu a sawi a ni.