No.7561/2020-2021

Vawiin khan DC Conference Hall, Mamit-ah District Task Force on Immunization (DTFI) chu an Chairman Dr. Lalrozama, IAS, District Bawrhsap hovin thutkhawm a ni.

Meeting-ah hian Covid -19 Vaccination Health Care Workers te tana pekchhuah tawh thlirletna neih a ni a. Dr.Lalmuanawma Jongte, Immunization Officer chuan Mamit District-in Covid - 19 Vaccine a dawn tawh dan leh hmachhawpte a lem nen report pein thawhkhatna atan Health Worker bikah mi 692 ( 81.41%) te hnenah hridanna pekchhuah tawh an ni a, Hridanna lak avang hian harsatna Adverse Effect Following Immunization (AEFI) lian tham tawk an awm loh thu leh khawsik satliah deuh neihte pawhin engmah harsatna an tawh zui loh thu a tarlang a. Vaccine thawhhnihna atan hian Frontline Workers mi 1954 te hnenah karleh chhung hian pek leh tum a nih thu meeting-ah hian tarlan a ni bawk. 

Covid -19 Vaccination Frontline Workers-te tana kalpui leh turah hian venhimna lama thawktute, DC Office leh hrikai hlauhthawnawmna hmuna duty-te thlanchhuah an ni a,  Vaccine la tur reng reng hian Aadhar original emaw photo copy ken tur a ni. Hridanna hi an mahni awmna PHC hnai bera lak tura ruahman niin Vaccine hi Nu naupai, Nu hnute pe lai leh kum 18 hnuailamte tan lak theih a ni lo a ni. 

Covid - 19 Vaccination hi 2nd dose lak atanga Ni 14 hnuah chauh Immunity a awm thei a, chuvangin hridanna la te pawhin Covid-19 laka himna tura dan siamte zawm zui zel tur a ni. 

Mamit District hian Covid -19 Vaccine hi Health Care Workers te tan first dose 1000 a dawnah 820 hman ral a ni a, Health Care Workers te tan 2nd dose 700 dawn leh niin tunah hian Frontline Workers te tan first dose-ah 2050 dawn leh a ni a. Avaia Mamit District-in Vaccine a dawn tawh zawng zawng hi 3750 niin Vaccine pek tura ruahman hi mi 2804 an ni.

Pu. R. Lalmuankima, UNICEF, State Consultant-in Health leh Nutrition chungchanga kan District dinhmun hrang hrangte a lem nena entirin sawifiahna a nei a. Pu Beitlotha Nohro, SDC/ Nodal Officer pawhin Health Department hnuaia hmalakna hrang hrang tarlangin Mamit District chhungah Sub Centre  -7, Health Workers quarters Type - I 10 leh Nurse te awmna tur Type - II quarters 9 sak mek a nih thu bakah Ambulance, thisen leh thildang test-na hrang hrang Portable Compact Mobile Laboratory (PCML) REC.LTD, CSR hnuaia dawn te chu District chhung Health Workers-te hnenah semchhuah nghal a ni. 

Vawiin thutkhawmah hian Pu R. Lalmuankima, UNICEF bakah DTFI Committee Members-te an tel tha hle a ni.