802/2022-2023
Mamit 7th June, 2022 : Vawiin khan DC Conference Hall, Mamit-ah Pu Lalnunhlua, Mamit District Bawrhsap/Chairman, DTFI hovin District Task Force On Immunization thutkhawm a ni a. Mamit District chhunga hri danna hrang hrang pek chhuah dan bakah Covid-19 Vaccine pek chhuah dan thlirletna neih a ni.

Meeting-ah hian Dr. Lalhlimpuii, Surveillance Medical Officer, WHO Mizoram bialtu chuan Mamit District chhunga hri danna hrang hrang pek chhuah anih dan Power point presentation hmangin report a pe a. Kum 2021-22 chhunga Vaccine pek tura Session Planned 751 ah 721 neih theih a nih thu sawiin ASHA Worker awm loh vangte, Health Worker awm loh vangte, intlawhpawhna kawng chungchangah harsatna a awm thin avang te leh hri danna la duh lo hrim hrim an awm thin avangin hri danna pekchhuah kawngah harsatna an tawh thin thu a sawi a. Nu naupai leh naupangte'n a hun taka hri danna an lak theihna turin Department dangte tawiawmna leh thawhhopuina an mamawh thu a sawi bawk.

Vawiin thutkhawmah hian Dr. Lalnuntluangi Khiangte, District Immunization Officer, Mamit hnen atangin Mamit District chhunga Covid-19 Vaccine pek chhuah tawh dan ngaihthlak niin tun dinhmunah 1st Dose - 56615, 2nd Dose - 42941, Precaution - 2508, avaiin 102064 pekchhuah anih thu a tarlang a. Vaccine pe-a khaw 74-a In 11398 te an tlawh chhuah tawh thu a tarlang bawk.

Meeting-ah hian District Task Force on Immunization Members te an tel tha hle a ni.