801/2022-2023
Aizawl,7th June, 2022 : Vawiin khan Mizoram Sorkar hnuaia Department hrang hrang - Transport Department, Traffic Police, SIRD&PR leh Mizoram Taxi Association te tangkawp buatsaihin Taxi Sticker ‘C’ te tan "Orientation Training for Taxi Drivers/Opeartors" Vanapa Hall-ah neih a ni a, Transport Department Minister Pu TJ Lalnuntluanga chuan Khuallian niin he training hi a hawng a ni.

Khuallian Pu TJ Lalnuntluanga chuan Taxi Driver-te tana intuaitharna hun buatsaih a ni chu lawmawm a tin thu sawiin, Public Transport Driver-te tana intuaitharna neih hi hun rei taka tang tawh khan ruahmanna neih a nih tawh thu leh Hripui leng avanga hmalak mai theih a nih loh thu a sawi a. He Training neih a nih theih nana hmala tute leh fund tumtu SIRD&PR te chungah lawmthu a sawi bawk.

Khuallian chuan Driver-te hi kan pawimawh em em a, ram economy hi kan kutah thui tak a innghat a, chuvang chuan hnam hmangaihna thinlung kan put a ngai a ni, a ti a. Midangte tan malsawmna thlentu pawimawh tak kan ni bawk a, mahse, mi tlemte avangin kan hmai a bal fo thin a, chuvangin kan inzirtir a, kan infuih a, hma kan sawn zel a pawimawh a ni, a ti bawk.

Lirthei chetsualna tarn tak hi Driver-te fimkhur loh vang a ni fo a, nunna hlu tak kan kutah a innghat a ni tih kan hriat reng a pawimawh a, inthlahdah a, fimkhur lo taka awm thei kan ni lo tih kan inhriat reng a ngai a ni, a ti a. Dan kan zawm a pawimawh thu sawiin, dan kan zawm a, dan ang taka thil kan tih a, lirthei kan khalh hian nunna tarn tak kan humhim thei a ni, Transport Minister chuan a ti bawk.

Driver-te hian zawldawh leh inhrethiam tawn tak a, Dan zawm chunga lirthei kan khalh thin a pawimawh thu sawiin, hawihhawmna leh midang ngaih chan thiamna hi a pawimawh em em a ni tih kan hriat reng a pawimawh a ni, khuallian chuan a ti a. Dam duha sum leh pai tarn tak kan sen laiin, kan fimkhur tawhloh avangin leh kan inthlahdah avangin nunna hlu tak kan chan thin a ni, chuvangin, nunna hlu tak humhimtu ni thei tura inbuatsaihna atan leh hlawk leh tangkai taka he training hi hmang tura duhsakna hlanin Pu TJ Lalnuntluanga, Transport Minister chuan he training hi a hawng a ni.

He Training hawnna inkhawm hi Pu R. Lalrammawia, Director, Transport Department chuan kaihruaiin, inlawmna thu a sawi a. Pu F. Lalruatfela, General Secretary, Mizoram Taxi Association hnen atangin thusawi ngaihthlak a ni a, Pu C. Lalbiakthanga, Jt. Director (STA), Transport Department chuan lawmthu sawiin hun a khar a ni.

He training hawnna hun hman zawh hnu hian Technical Session hman chhunzawm nghal a ni a. Pi Golda Dell Zohmangaihi, Core Faculty, ATI hnen atangin "Manners & Etiquette" thupui hmangin zirtirna ngaihthlak a ni a, Pu Lalrinawma, Joint Director (MV), Transport Department hnen atangin "Motor Vehicle Acts & Rules: Documentations & Registrations" chungchang ngaihthlak a niin, Pu C. Vanlalvena, MPS, Addl. SP, Traffic hnen atangin "Motor Vehicle Driving Regulations & Responsibilities" tih thupui hmangin zirtirna ngaihthlak a ni bawk.

He training-ah hian Taxi (Sticker - C) Driver mi 785 an tel a, ni 9.6.2022 hian Taxi (Sticker - A) Driver-te tan training hi buatsaih leh a ni ang.