800/2022-2023
Kolasib dated 7th June 2022: Vawiin khan 1st IR. Battation Headquarters Mualvum-a ramngaw siamna leh faina kawng a beihpui thlakna tur ‘Afforestation and Clean Mualvum Project’ chu Tuirial Assembly Constituency bialtu MLA Pu K Laldawngliana, Vice Chairman Commerce & Industrial Development Board chuan a hawng a.

Hun kaihruaitu Pu MS Dawngkima, 1st IR Bn. Commandant chuan Mualvum chu ramngaw tha tak leh zau tak a nih thin thu leh ramngawte a lo chereu tan tak avangin he Project kaltlang hian thar thawh leh tum a nih thu a sawi a. Hemi atan a thing tiak phun tur Forest Department-in an pek avangin lawmawm sawiin Project kalpui dan tur sawifiahna hun a hmang bawk a ni.

Pu K Laldawngliana, MLA chuan Mualvum chu hmun nuam tak a nih theih nan ‘Afforestation and Clean Mualvum Project’ chu tihlawntling ngei turin kalkhawmte a chah a. Kan ram chhung a ramsa, sava leh thing te chuan hmangaihtu an mamawh a, an mamawh ang chiahin a ti na lo zawnga dimdawih tak a enkawl thiam a pawimawh thu a sawi a. Nungchate leh ramngaw hlutna leh pawimawhnate zau zawk a kan inzirtir theih nan Social Media kaltlangte pawh a phochhuah tam a tul thu a sawi bawk a ni.
Kolasib Forest Division aiawha tel, Pu Thanliana Hauhnar, ACF chuan ramngaw pawimawhnate sawiin mihring leh thil nung dang te nunna tan a hlauhawm lo hip raltu leh nunna min petu an ni, a ti a, duat taka enkawl bakah nungchate pawh inmamawh tawn kan nihna anga humhalh tlat an ngaih thu a sawi bawk.

Hemi hnu hian 1st IR. Battation hnuai a HSLC leh HSSLC pass thar te lawmpuina hun hman a ni a, MLA hian hlawhtlinna chang te hnenah chawimawina thuziak a hlan.

Mualvum-a ramngaw siam thar lehna tur a bul tan nan MLA Pu K.Laldawngliana chuan thing a phun nghal a, he hunah hian Forest Department hotute, 1st IR Bn. hotute leh Kawnpui khawtlang hruaitute an tel a ni.