799/2022-2023
Aizawl, the 7th June 2022 : Home Minister Pu Lalchamliana’n vawiin khan 23 Sector Assam Rifles ten an buatsaih Ruihhlo Dona atana campaign ‘Anti Drugs Awareness Campaign’ June ni 7 atanga June 20 thleng programme hrang hrang duanga an neih tur chu Loch Hall, 2nd Assam Rifles hmunpui Lammual ah a hawng.

Campaign hawnna ah thusawiin Home Minister Pu Lalchamliana chuan ruihhlo leh drugs abuse hi mimal mai in an tuar lova, chhungkaw, khawtlang leh ramin kan tuar a ni tih hi kan hriat nawn leh ka duh a, Mizorama chhungkaw zahve aia tamin ruihhlo avangin kan tuar a ni, a ti a. Ruihhlo dona kawnga a thapui thawhtu CYMA ten kum kum engemaw zat kaltaa SRS an insiam a, ruihhlo dona beihpui an thlak kha a sawt hle tiin, an hmalakna te khan nasa takin ruihhlo dona kawngah Police, Excise leh Assam Rifles te a pui niin a sawi a. Khatianga ruihhlo dona kha tunah kan ramin a mamawh hle niin ka hria, a ti a. Kohhran leh pawl hrang hrang ten an hma zawna theuh ruihhlo do nan nasa takin hma an lak thu sawiin heng hmalakna te hi tuna aia nasa leh zawka kan kalpui a ngai tiin a sawi bawk.

Home Minister chuan Assam Rifles in ramri vengtu pawl an nihna anga ruihlo an man bakah hetiang thalai leh khawtlang huapa ruihhlo that loh zia inzirtirna leh campaign an buatsaih chu lawmawm tiin medical camp te leh khawtlang tana CSR ang an kalpui thin chu chhunzawm zel turin a chah a. Tunhnaia Social Welfare & Tribal Affairs Department in ruihhlo khawih thin chungchanga zirna survey an neih ah thalai te bakah tleirawl te, Middle School naupang ang te pawh ruihhlo, ganja leh dendrite ah an inhnamhnawihin an khawih thin tih hmuhchhuah anih thu sawiin , hei hi a pawi khawp maia, zirlai naupangte reng reng chu ruihhlo lakah inthiarfihlim tlat turin leh tichhin reng reng lo turin ka chah duh che u a ni, a ti.

Thusawitu dang Assam Rifles hotu, 23 Sector Commander, Brig. Digvijay Singh chuan Mizoramin chu khawvela ruihhlo hmunpui tia sawi Golden Triangle hnaia awm anih avangin a tuar nasa a, chu mai baka mihring cheng zat ngaituahin ruihhlo ngai an tam a, hei hi thil ngaihtuahawm tak nia a hriat thu a sawi a. Mizoram leh Mizo mipuite chu mawi takin, a bikin mipuiin traffic dan an zawm danah ram pumah a thang meka chutih laiin ruihhlo dona kawnga Mizoram chuan hma nasa takin a lak a ngaia, ruihhlo dona hi khawtlang leh mimal rilru atanga a chhuah hma chuan do rem tak tak a har thei tiin a sawi. Assam Rifles ten nitin deuh thawh ruihhlo an man thin thu sawiin mamawhna demand a awm chhung chuan supply hi a awm reng dawn a, chuvangin chhungkuaah a pawimawh ber ruihhlo ti lo a chhungtin inzirtir a ngai hle niin a sawi.

Kar hnih chhung awh tur (June 7 – June 20) Anti Drugs Awareness Campaign hi Assam Rifles chuan chhawng thumin buatsaih tumin thalai te tintuah an tum ber a ni. Vawiin hawnna programme ah hian school hrang hrang zirlai naupang engemawzat bakah tlawmngai pawl hrang hrang aiawhte pawh sawm an ni a, chhawngkhat naah a hawnna leh Ruihhlo Do thupui ah hmangin school naupangte lem inziahsiak buatsaih a ni a. Chhawng hnih naah awareness campaign te, ruihhlo ti thin sim tawh te nen inkawmna te, panel discussion leh a dangte tih a ni dawn a. Chhawng thumnaah Lunglei atangin Aizawl thleng bike rally buatsaih a ni bawk ang a, he campaign hi June ni 20 thleng an kalpui dawn a ni.

Mizoram Police in an chhinchhiah danin kumin kum tir atangin May thla tawp thlengin heroin kg 8.624; ganja kg 35.335 leh methamphetamine 39.689 an man tawh a, henga inhnamhnawih mi 107 man niin thubuai 79 ziahluh a ni tawh. Excise & Narcotics Department in kumin kumtir atangin May ni 15 thleng khan heroin kg 10.081; ganja kg 68.850 leh methamphetamine kg 30.739 an man tawh a, henga inhnamhnawih mi 267 an man bawk a, NDPS Act 1985 hnuaiah thubuai 193 ziahluh a ni tawh bawk.

Excise & Narcotics Department chhinchhiah danin nikum khan ruihlo hmansualna drugs abuse avangin mi 47 an boral a, kumin May ni 15 thleng khan ruihhlo drugs abuse vangin mi 7 an boral tawh a ni.