150/2023-2024

Mamit 19th April, 2023 : Vawiin khan DC Office Chamber, Mamit-ah District Level Coordination Committee on Civil Registration System of Births & Deaths Mamit District chu an Chairman Pu V.L. Remliana, Mamit District Bawrhsap hovin thutkhawm a ni.

Mamit District Bawrhsap chuan Meeting tura kalkhawm DLCC Member-te chungah lawmthu sawiin India khua leh tui dik takte chauhin Birth Certificate kan neih theih nan Department hrang hrangte thawhhona a pawimawh thu a sawi a. Birth Certificate kan ngaihpawimawh theih nan Sikul Admission-ah te pawh demand zel nise a tih thu a sawi.

Meeting-ah hian damdawiina nau neite'n damdawiin an awm chhungin an fate hming phuah hman lo an awm thin chuan birth certificate pekchhuahna lamah harsatna a thlen thin thu tarlan a ni a. Damdawiin-a an awm chhung ngeiin naute hming hi phuah hram ni thei se, anih loh vek pawhin chhui zui leh awlsam nan damdawiina Deaths & Births registrar leh thawktute'n naute nu leh pa hming leh address bakah an phone number chiang takin chhinchhiah nise tih a ni. District Research Officer te pawhin khawtina an Registrar of Births & Deaths te hmang tangkai a, naupiang hming la nei lo-te Birth Certificate pekchhuah theih an nih loh avangin hemi chungchanga harsatna awm thin sutkian dan zawn nise tih a ni.

Meeting-ah hian Digitized Births & Deaths Certificate chungchang sawiho niin a duh apiang tan Rs. 220/- chawiin DRO Office, Mamit District-ah a tih theih a. Digitized Births Certificate bik hi phai lama inkhel mite leh zirna avanga phaia kal thinte tan a tul thin avangin Mamit District mipuite'n nakin huna harsatna kan tawh loh nan ti theuh turin Committee chuan mipuite a ngen a ni.

Birth Certificate-a hming, nu leh pa hming, pianni leh thla-te hi tihdanglam mai mai theih anih tawh dawn loh avangin mipuite'n uluk leh fimkhur takin, a dik tak tilang thin turin Committee chuan mipuite a chahin a ngen nghal bawk a ni.

Vawiin thutkhawmah hian DLCC Members te an tel tha hle a ni.