National Initiative for School Heads' and Teachers' Holistic Advancement (NISHTHA) hnuaiah Mamit District chhunga Elementary School Headmaster-te leh zirtirtute tan Samagra Shiksha, Mamit District buatsaihin 1st Batch Training chu vawiin khan Siamliana Hall, Mamit-ah Pu Jacob Lalawmpuia, Addl. DC, Mamit chuan khuallian niin a hawng.

Khuallian chuan Training tura kalkhawmte zahna chibai bukin nu leh pa tiam lova naupangte enkawl nasa bertu leh nghenghnai bertute chu zirtirtute an nih angin zirtirtute chu kan ram dinhmun leh kan khawtlang dinhmunah mawhphurna kengtu pawimawh tak an ni a ti. Thahnemngai taka kan thawhrahte kan ram leh khawtlangin kan la tel dawn tih hrereng tura chahin kan thawhrahte kan dam chhungin kan hmu hman lo pawh a ni maithei, kan tu leh fate, kan ram leh hnam tan a ni tih hrerenga a tha zawnga bul tantu ni theuh turin Training tura kalkhawmte a chah a. Zirtirtute chu khawvel danglamna thlen theitu an nih anga thathona thar nen hmalam pan turin a chah bawk.

Zirtirtute chu hmanlai atang tawhin khaw khat pa rawn, mi zah leh chung en an ni thin a, chu an dinhmun hlu tak chu humhim zel turin a chah nghal bawk.

Pu K. Malsawmhlua, Lecturer, DIET Mamit chuan Keynote Address pein August Ni 21, 2019 a launch NISHTHA chuan India rampum Training-in a tuam chhuak dawn a. Tum danga Training ang ngawt a nih dawn loh thu leh NISHTHA hnuaiah chuan thil thar zir tur tam tak a awm dawn bakah Training hma leh Training hnuah Test an neih thlap dawn avangin nasa taka an inzir a tul dawn thu a sawi.

Training hi 25th - 29th November, 2019 thleng neih tur niin Resource Person sawm bikte'n thupui hrang hrang hmangin zirtirna an pe thin dawn a ni.