Rashtriya Gram Swaraj Abhiyan (RGSA) sum cheng nuai 20 senga sak,  Khuangleng Panchayat Bhavan/ VC House sak thar chu vawiin khan Local Administration Department Director Pu RS Lalzamliana'n  a hawng.

Pu RS Lalzamliana chuan Sawrkar leh khawtlang hruaituten theihtawp chhuaha an  buaipui hnua  Khuangleng Panchayat Bhavan hawn theiha peihfel ani ta chu lawmawm tiin, thahnemngai taka thawktute fakawm a ti a. Mizoram sawrkarin sawrkar laipui atangin nikum lamah VC House ti a hriat mai, Panchayat Bhavan thar 5 sakna tur cheng nuai 20 theuh  leh a hlui 4  thawmthatna tur cheng nuai 4 theuh a hmuh thu leh a thar sak tur zingah Khuangleng khua a tel  thu a sawi a. District Headquarters pan kher  ngai lova awlsam taka lehkha pawimawhte  lakchhuah theihna hmun tur a ruat, Community Service Centre (CSC) dinna tur thingtlang khaw 10 zingah  Khuangleng a tel avangin tun atanga reiloteah Panchayat Bhavan hmuna bunfel tum a  ni a, ICT department nena inzaitawn zel  tum a ni, a ti bawk.

Faina kawnga thingtlang khuate hmasawn chak zia chu fakin faina nunpui zel turin a fuih a. VC te chu rinawm leh taima taka khawtlang hmasawnna hna thawh te enkawl thin tura chahin, an hnathawh a zir zelin khawtlangin an teh dawn thu leh MLA te thlenga an chawimawi theih dawn thu a sawi a. Panchayati Raj Institute System India ram hmun tam zawka hman anih tawh thu leh  Mizoram, Nagaland leh Meghalayah te hman ani ve rih lo a, hman anih theihnan leh Central fund tam zawk hailuh anih  theihna turin buaipui mek zel a ni a,  PRI hmanna Sikkim leh Tripura lamah te zirchianna neih ani tawh a ni, a ti a.  Tul angte bawhzui mek zel niin, engtikah emaw chuan hman hun a la awm ve ngei ang, a ti a. LAD Director chuan Mizoram sawrkarin thingtlang khuate chawikana tihhmasawnna kawngah hma a lak chhoh reng thu a sawi a. Panchayat Bhavan thar leh nakin lawka a din  tur Community Service Centre-te chu khawtlangin tangkai taka an hman theihna turin duhsakna a hlan a ni.

DLAO Pu K.Lalhmuakliana pawhin thusawiin, Khuangleng khuain Panchayat Bhavan tha tak an nei thei chu a lawmpui thu leh Director-in  ngaipawimawha  a hawnna a rawn telpui thei chu lawmawm a tih thu a sawi a.  Khawtlang tana ni chhinchhiah leh pawimawh tak hmanpuia tihlawhtling tura lokal zawng zawngte chungah lawmthu a sawi bawk a ni.

Khuangleng  Panchayat Bhavan, Mual Venga hawn tak hi a dung feet 33, avang feet 30 a zau mizopa chhiara chhawng thum a ni a. VCP Room, Meeting Room, CSC awmna turte leh mamawh dangte a awm a ni. Kumin September thla tir phata sak tan niin, nimin November Ni 24, 2019 khan   sak zawha hawn theih tura peihfel a ni.

Hawnna puala hun buatsaih hi Pu S.Vanlaldina, Vice President, Khuangleng VC in a kaihruai a. Pu C.Vanlalhruaia, LDC LAD Champhaiin inhmelhriattirna hun hmangin, Pu H.Lalrinthanga, VCP Khuanglengin lawmthu sawiin hun a khar a ni. Hawnna hunah hian Department thawktute, Khuangleng leh a chhehvel khua VC leh NGO hotute an tel a ni.

Attachment

  • Loading attachment...