Vawiin khan Information and Public Relations changtu Minister of State Pu Lalruatkima chuan Aizawl Art Gallery neitu pa Pu Laltanpuia’n a lemziak te phochhuahna ‘Solo Painting Exhibition’ Aizawl Art Gallery, MUP Building ah a hawng.

Minister Pu Lalruatkima chuan thlalakna leh a hmanrua te awm hmaa thil thleng te, mihring nunphung te leh thil nih dan ruangam te chu lemziak thiam te kuthnu atangin kan hmuh theih phah nia sawiin an sulhnu atangin hmasang chanchin leh thil thleng te chu thang leh thar zel ten kan hriat phah a ni, a ti a. Lemziah hi awlsam takin lang mahse thil harsa tak, mi bik te talen dawn ani tiin lemziak miten an rilru thil veite leh an suangtuahna a thil awm te, thu a sawi chhuah thei miah loh pawh milem hmangin mawi takin hriatthiam thei turin an phochhuak thei leh an tarlang thei avangin an vannei bik hle niin a sawi a. Lemziah chu rilru a awm phawrhchhuah anih avangin mitdel hna a ni dante sawiin leh lemziah in rilru a khawih dante chu rimawi te nen tehkhinin, lemziak hian mihring nun thu tam tak a sawi a ni, a ti.

Pu Lalruatkima chuan hetianga mahni kutchhuak pholanga Solo Exhibition vawi 9 lai neih chu thil chhuanawm tak anih thu sawiin hetiang buatsaih thinte talen leh taimakna chu a chhuanawmin midang te tan entawntlak an nih thu a sawi a. Lemziak mite chu mahni irawmchhuak pholang tam a, originality nei tur te, an kalna leh hawina lamah theihtawp chhuah tur te leh Mizoram chhung chauh ni lo, state pawn thleng pawha huang zauh tur te in a chah a.

Thusawitu dang Information & Public Relations Department Director Pi Lallianpuii chuan lemziah(painting), lemchan(films) leh thlalak(photography) te than zelna atan Department in hma a lo lak dante sawiin henga inhmang te chu hnam dang leh ram dang ah te Mizoram  leh Mizo te chanchin sawi chhuaktu leh tarlangtu an ni, a ti. 

Tum tumah Pu Laltanpuia Solo Exhibition a tum 9 na niin a kutchhuak water color ‘Modern Mizo Village’ tih thupui lanna 34 pholan a ni a. Exhibition hi November ni 30 thleng  awh dawn a ni.