4253/2023-2024

Mamit 19th March, 2024 : Vawiin khan Excise & Narcotics Department Mamit District huaihawtin Kohhran hrang hranga thalai hruaitute nen ruihhlo do chungchang sawihona Pu Lalsangzuala Ralte, Assistant Commissioner hovin a Office Chamber-ah neih a ni.

Pu Lalsangzuala Ralte chuan Mamit District chhungah ruihhlo do beihpui thlak turin kohhran thalai hruaitute puihna an mamawh thu a sawi a, kalkhawmte chu an mahni kohhran theuhah uar taka puangzar turin a ngen bawk. Excise & Narcotics Department atanga ngenna siamin, thawktute tana tawngtai sak, thalaite hnena ruihhlo nghawng thalo hrilhhriat, ruihhlo bawiha tang mek te chhanchhuahna kawnga hmalak, sual lak atanga thalaite dah hran, thalaite  eizawnna nghet nei tura inzirtir, chhungkaw tha (kristian chhungkua) din ngei tura thalaite inzirtir leh kohhran atanga thalaite inzirtirna chu an beiseina lian ber a nih thu a sawi.

Vawiin thutkhawmah hian Excise & Narcotics Department leh Mamit khawpui chhunga kohhran hrang hrang thalaite chuan resolution siamin nasa zawk a ruihhlo do tura thawh ho nise tih a ni.

He hunah hian Mamit khawpui chhunga Kohhran hrang hrang thalai hruaitute, Excise & Narcotics Department Officers leh Staff te an tel a ni.