61/2023-2024

Mamit 5th April, 2024 : Shri. Arvind Sharma, IRAS, Lok Sabha General Election lo awm tura 1- Mizoram (ST) Parliamentary Constituency Expenditure Observer hovin vawiin khan Taitesena Buk, DC Office Mamit-ah thutkhawm a ni.

Meeting-ah hian kumin MP General Election April Ni 19-a neih turah Expenditure kaihhnawih Surveillance team hrang hrang member te chu an tih tur leh tih loh turah chiang se a duh thu Observer chuan a sawi a. Mahni duty theuh tha taka an thawh theih nan inzir peih a, Standard 0perating Procedure (SOP) tha taka zawm a, video thlalak uluk taka evidence atan la zel turin a chah. MP election-ah hian candidate te'n cheng nuai 95 thleng chauh election campaign expenditure atan ECI chuan a phal avangin uluk taka vil a, account vawng tha turin a chah a ni. Election Commission of India (ECI) kut leh ke an nih inhrerengin tha taka an hna a inthlurbing a, election felfai leh rualkhai a awm theih ngei a beisei thu a sawi bawk a ni.

Thutkhawmah hian DEO/DC Mamit chuan vawiina Surveillance team kalkhawmte chu Mizo kan nihna-a kan inhmaizah thinna te dah tha a, khauh taka dan kenkawh a pawimawh thu sawiin Motor veivakte pawh phal loh thil phur an awm loh nan check tam turin a chah a. Police leh Excise & Narcotics lam atanga zu leh ruihhlo an man report ngaihthlak a nih bakah venhimna lama SP Mamit hmalakna te Meeting-ah hian ngaihthlak a ni bawk a ni.

Vawiin thutkhawmah hian SP, Mamit, Nodal Officer, Expenditure Monitoring, Asst. Expenditure Observer zawng zawng, Flying Squads leh Static Surveillance Team Magistrate te, Video Surveillance Team leh Video Viewing Team Leader te, Member Secretary, MCMC, Asst. Commissioner, Excise & Narcotics Department bakah SBI Mamit Branch Manager te an tel a ni.

Attachment

  • Loading attachment...