No.3678/2021-2022

Aizawl 15th January, 2022 : Vawiin khan DC Conference Hall, Mamit-ah Final Electoral Rolls, 2022 chu Dr. Lalrozama, IAS District Election Officer/District Bawrhsap chuan a tlangzarh.

District Election Officer chuan Election Commission of India duhdan anga Final Electoral Rolls, 2022 tlangzarh a nih theihna tura a buaipuitu elections officials te chungah lawmthu sawiin, Khawtlang hruaitu leh tlawmngaipawlte thawhpuina leh tawiawmna-ah lawmthu a sawi bawk. Final Electoral Rolls, 2022 tlangzarh takah hian Tripura Transit camp atangin form 6,7,8 leh 8A lut a awm loh thusawiin Transit camp-ah hian Elections Official-te pawh tirh an nih loh thu leh Final Rolls, 2022 tlangzarh takah hian thun thar an awm loh thu a sawi.  

Pu Lalhmachhuana, Election Officer chuan Final Electoral Rolls, 2022 tlangzarh tak sawizauna a nei bawk.

Vawiin-a tlangzarh tak Final Electoral Rolls, 2022-ah hian Mamit District chhungah vote nei 70861 awmin mipa 35860 leh hmeichhia 35001 an ni a. Polling Station hi 117 a awm a ni. Vote nei punna hi voters 1520 niin 2.19% a ni. Mamit District chhunga Assembly Constituency pathum atanga vote nei tam ber na leh tlemna ber chu hetiang hi a ni. 1-Hachhek (ST) atangin Zamuang Polling station-ah voters 1214 awmin a tamna ber a ni a, Sotapa Polling Station-ah Voters 132 awmin a tlemna ber a ni thung. 2-Dampa (ST) ah Saithah Polling Station-ah Voters 1065 awmin a tamna ber a ni a, Zopui Polling Station-ah Voters 49 awmin a tlemna ber a ni. 3- Mamit (ST) ah hian Damparengpui-II ah voters 1197 awmin a tam ber a, Tlangkhang Polling Station-ah 164 awmin a tlemna ber a ni thung a ni. Tun-ah hian tripura transit camp atanga Mizoram-a vote nei hi voters 8987 a ni bawk.

District Election Officer chuan vawiin-a tlangzarh tak Final Electoral Rolls, 2022 hi Political Party aiawh BJP, INC, MNF leh ZPM te hnenah hlanna a nei nghal a ni.

Vawiin-a Final Electoral Rolls, 2022 tlangzarhna hunah hian Elections officials, Political Party aiawh, Tlawmngai pawl aiawh leh thutharthehdarhtute an tel a ni.