Vawiin khan I&PR Conference Hall, Mamit-ah Fire Prevention Week, 2020 chu Dr. Lalrozama, IAS, Mamit District Bawrhsap, District Level Fire Prevention Committee Chairman ni bawk chuan khuallian niin a hawng.

Khuallian chuan khawtlang hruaitute, Sorkar Officials leh NGO hrang hrang bakah khawtlang mipuite chu ram tikang lo tura theihtawpchhuaha tanhopui turin a sawm a. Lo/Leipui hal hunah pawh a bik takin Mamit District chhunga khawtin VC te chuan khauh taka thuneihna an keng kawh a beisei thu a sawi. Ramkang chuan chawp leh chilhin min tawrhtir a, a rei hnuah pawh harsatna nasa tak min thlen theih avangin theihtawpchhuaha ram kang tur kan ven tlan a ngai a. March Ni 15 hnulama lo leh leipui halte chu dan anga hrem an nih dawn thu a sawi bawk.

Pu Lalnunsanga Khawlhring, DFO, Member Secretary, District Level Fire Prevention Committee chuan report pein Kum kalta 2019 chhung khan Mamit District chhungah kangmei hmun 142-ah chhuakin ram 160 ha. a zau a awh a. Heng ramkang report te hi Lo, huan leh leipui hal a ni tih a hmunah finfiah vek a nih thu a tarlang a. Nikum 2019 chhungin Mamit District-ah ram tikang hremna pek tumah an awm loh thu a tarlang bawk.

Pu K. Lalmuankima, Honorary Wildlife Warden, Mamit District pawhin thu sawiin kan ramngawte kan humhalh that loh avangin sik leh sa lama kan hunbi chhiar thin te a mumal tawh lova, ramkang tur vengtu kan ni thei lo anih pawhin midangte titangtu nih tum theuh turin kalkhawmte a chah bawk.

Kumin Fire Prevention Week thupui hi "Kangmei chhuak tur veng la, i ram chhan rawh" tih a ni a. He hun hi Pu K. Eley Rosanga, President, Sub Hqrs YMA Mamit-in kaihruaiin Pu C. Lalthantluanga, RO Mamit chuan kalkhawmte hnena lawmthu sawina a nei a. He hunah hian Mamit khawpui chhunga khawtlang hruaitute, tlawmngai pawl hrang hrang aiawhte, zirlai naupangte, Sorkar Department sawmbikte bakah thutharthehdarhtute an tel a ni