Vawiin chawhma khan RB McCabe Hall, Aijal Club-ah Pu Lalnunmawia Chuaungo, Chief Secretary chuan Bank services leh facilities hrang hrang te a chhawr tangkai thei tur ten an chhawr theihna tura inzirtirna Hapta, " RBI's Financial Literacy Week(FLW)" chu a hawng a. He hun hi Banker te leh Entrepreneur ten an chhim a. Kumin FLW thupui atan hian Micro, Small and Medium Enterprises( MSMEs) hman a ni.

Chief Secretary Pu Lalnunmawia Chuaungo chuan kumin FLW atana thupui hman 'MSMEs' chu Mizoram tan bika pawimawh takzet tih a sawi a. Industry lianpui pui te chu eizawnna hnasiam kawngah thawh hlawkber an ni ngai lo a ti a. MSME te anga sumdawnna te zawk leh a laihawlte hi eizawnna tamtak siamtu an ni ziah zawk a ni a ti.

Sumdawngliante chuan Bank duhsakna an dawng bik thin a; hetih laiin MSMEs huanga mi, Sumdawng tenaute'n tanpuina dila Bank an dawrin ngaihsak an hlawh thin lo chu thil fuh tawklo a ni tih a sawi a. Eizawnna siam tam zawk leh mipui nawlpuiin an hlawkpui zawk, MSMEs te duhsak chu thil tihawm tak zawk a ni a ti. Eizawnna ngel nghet din tuma hmalatuten Bank tanpuina an mamawh thin a. Mahse, a mamawhtu tam zawk te hian Bank hnathawhdan, Bank kalphung, Bank in tanpuina sum a pek dan leh Bank in Scheme tha tak tak a neih te an hre lo thin a. Hei vang hian mi zawng zawng huapzo Financial Services ti puitling turin Mizoramah bik chuan tan lak a ngai nasa hle a ni a ti. Hei hi Mizoram dinhmun a nih avangin Mizorama Bank awm mek te chuan Financial Literacy Campaign pawh Mizoram hmun hrang hrangah ngawrh zawka an kalpui a ngai tih a sawi a. Sumdawnna leh eizawnna kawng thenkhata bul tan tum ten engtin nge Bank leh Financial Institution te an chhawr tangkai theih ang tih lo kawhhmuh kawngah Banker te mawhphurhna a sang hle a ni a ti.

Chief Secretary chuan RBI hotute sawihmuh angin Sawrkar Agency pakhat kaltlanga mipuiin sawrkar hnuaia development scheme zawng zawngte an hriat theihna tur buatsaih chu thil pawimawh tak a ni tih a sawi a. Hei hi sawrkar thuneitusang te hnenah a thlen nghal tur thu a sawi bawk a ni. Mizoram Rural Bank(MRB) in tunhnaiah Loan latute hamthatna tur atan Loan thachhang dawltu, additional Fund pe tela ruahmanna thar a siam chu Bank dangten entawn se a duh thu a sawi a. RBI in Financial Literacy Week a buatsaih chhung bakah a rem chan dan anga Bank leh Financial Institute chhawr tangkai dan Mipui hnena zirtir pe chhunzawm sauh sauh turin Mizorama Bank hnathawk zawng zawngte chu a chah nghal bawk a ni.

RBI's FLW sawihawngtu Pi Mary L.Deng, General Manager & Officer -in-Charge, RBI Aizawl chuan MSMEs te pawimawhna hre nawn thar leh turin Banker kalkhawmte chu a chah a. MSMEs hian Manufacturing Sector a thawhchhuah zawng zawnga 45% lawih a hauh a, mihring vaibelchhe 11 tan eizawnna a siam a, India GDP-ah 28% a thawh a, Agriculture Sector thawhchhuah tih lohah chuan ram economy atana thawh hlawk ber a ni a ti. MSMEs pawimawhna leh hemi huanga mi tamzawk ten eizawnna an tan theihna turin RBI leh a hnuaia Bank te chuan ngawrh zawkin Financial Literacy Campaign an kalpui chho dawn a ni a ti.

Vawiina RBI's FLW hawnna programme-ah hian Pu SN Malik, GM, NABARD, Pu Lalchuangkima, AGM, SBI, SLBC Convener, Pu Jay Chandra, Chairman, Mizoram Rural Bank leh Pu C.Sangpu Vaiphei, AGM, RBI, Aizawl te pawn thusawina hun an hmang a ni.