No.7461/2020-2021

Vawiin khan LAD Conference Hall, Mamit- ah Fire Prevention Week, 2021 chu Dr. Lalrozama, IAS Mamit District Bawrhsap/Chairman, District Level Committee on Fire Prevention (DLCFP) ni bawk chuan khuallian niin a hawng.

Khuallian chuan keimahni hmakhua, kan tu leh fate tan chenna tlak ram kan hnutchhiah theih nan ramkang tur lakah tan la a, fimkhur lehzual turin kalkhawmte a chah a. Ram kan tih kan nasat hian kan economy-ah nghawng a nei a, tun maiah harsatna thlen lo mahse nakinah kan tu leh fate tan a la tangkai dawn a ni a ti.

Kumin Fire Prevention Week 2021- thupui ' 'Kangmei tichhuak lo turin mitin i fimkhur ang u' tih a nih angin mitinte in lamah fimkhur tura inzirtirna ngaihpawimawh nise tiin kan fate, naupang tete-ah kangmei laka fimkhur tura inzirtirna tuh theuh turin District- nu leh pa te a ngen a. Fimkhur taka tan kan laka kan thawhho chuan kangmei lakah kan ram a him ngei a beisei thu a sawi. Khuallian chuan kangmei chhuak tur laka fimkhur dan kawng sawiin bati chhit lai kalsan emaw meizial bung paih mai mai lo a tihhlum ngei leh loneitute paw'n meikawng tha taka sial turin District- mipuite a ngen a ni.

Pu PC. Lalchhandama, DFO , Member Secretary, District Level Committee on Fire Prevention chuan Report pein Lo/ huan hal turte chuan March Ni 15 aia tlai lovah hal vek tur a ni a, Lengpui Airport  chhehvel khuate chu chawhnu dar 3:00 hnu-ah chauh hal tura ngen niin Nikum 2020-chhung khan Mamit District chhungah Forest Survey of India in Satellite thlalak hmanga a chhinchhiah danin kangmei chhuahna hmun (fire point) 211- a awm a, ram 497.90 Ha a kang a, mahse heng ho hi finfiah an nih hnuah hmun 205 (493.40 Ha) chu lo/huan/leipui/ bawlhhlawh hal a ni a. A dang hmun 6 (4.50Ha) chu ramkang an nih thu a sawi.

Pu K. Lalmuankima, Honorary Wildlife Warden Mamit District- pawhin thusawiin kalkhawmte fuihna thuchah a sawi ve bawk.

Vawiin Fire Prevention Week hawnna hun hi Pu H. Rodingluaia Chairman Jt.VC, Mamit- in kaihruaiin Pu Lalringliana R.O  Mamit chuan lawmthu a sawi a. He hunah hian Mamit khawpui chhunga Sorkar Department hrang hrang hotute, khawtlang hruaitute leh thutharthehdarhtute an tel a ni.