Vawiin khan Chhimveng YMA Hall, Mamit-ah FOCUS Mizoram Project chungchangah District Level Consultation Meeting Mamit District chhunga Village Council President leh Secretary zawng zawngte nen neih a ni.

Pu R.K. Nithanga, State Project Director, FOCUS Mizoram chuan Project chungchang sawifiahin he Project-in a tum ber chu zokhaw lama thingtlang lo neia eizawng chhungkua 64500 te thlai thar a tam zawk theih nana tihhmasawn leh kumtin lo hal avanga sik leh sa inthlak danglam nasa lutuk tihziaawm a ni a ti a. He Project hi hlawm thumah then niin thingtlang lo neih tihhmasawn, man man zawka ran leh thlai thar chhuahte deh ral theihna tura ruahmanna hrang hrang siam leh Project kaihhruai dan bakah thiamthil inzirtirna a nih thu a sawi. He hmalaknain a tum angin, lo neitu an ram leilung luangral tur humhalhna kawnga hmalate chu an lo vah ram atanga 25% (0.25 ha) chinah tanpuina an dawng thei anga, hei hian thingtlang lo neitute nasa takin hmasawnna a pe dawn a ni a ti bawk.

Pi Hmangaihzuali, Dy. Director (Horticulture) pawhin FOCUS Mizoram chu Party mi leh sa induhsakna tur atana duan ni lovin mi taima leh a mamawhtute tana Project a nih thu a sawi a. Ei leh bar zawnna kawng hrang hrang lo neih, ran vulh leh a hralh chhuahna kawngah nasa takin he Project hian min pui dawn a. Mizorama District 4 an thlanchhuah zingah Mamit District chu he Project kalpui hmasa ber an nih thu sawiin a tha thei ang ber leh a nih dan tur ang taka hmang a, District dangte entawntlak a thawk turin a chah nghal bawk.

VC tinte chu an khuaah Farmer Interest Group (FIG) din tura hrilh niin Village Forest Conservation lam pawh an khua theuhah uar taka kalpui tura ngen an ni bawk.

Vawiin Consultation Meeting-ah hian VC-te chuan he Project hlawhtlin theih nana an ngaihdan leh an duhdan angte sawilangin sawihona hun neih a ni a. VC-te ngaihdan chu a theih chin china kalpui tura hmalak a nih tur thu Project hotute hian an sawi. Zawhna leh chhanna hun tha tak hmanho a ni bawk.

District Level Consultation Meeting hi Pu C. Lalengzauva, District Project Manager, DAO Mamit ni bawk chuan kaihruaiin Project Management Unit, Aizawl atangin Officer leh Staff 13-in he hun hi an rawn hmanpui a ni.