Vawiin khan Mizoram chhung hmun dangte rualin Mamitah Green Mizoram Day urhsun taka hman a ni a. Green Mizoram Day hawnna hun hi LAD Conference Hall, Mamit Hmarvengah neih niin Pu Bhupesh Chaudhary, Mamit District Bawhrsap chu khuallian a ni.

Khuallian Mamit District Bawrhsap chuan vawiin Green Mizoram Day a thingphun tura kalkhawm Sorkara a thawhpuite, tlawmngai pawl hrang hrang leh khawtlang hruaitute hnenah lawmthu a sawi a. Kan tu leh fate tana kan hnutchhiah theih hlu ber chu thingphun hi a ni a, chenna tlak ram siam tura Green Mizoram Day hmanga thingphun a ni thin chu lawmawm a tih thu sawiin Mizoram Sorkar hmalakna chu India ram State dangte zingah pawh entawntlak a nih thu leh midangte zirtir chhawngtu ni thei tur khawpa theihtawpchhuaha hmala turin a chah a. A phunsa enkawl zuina kawngah pawh tan la zel turin kalkhawmte a chah bawk a ni.

Pu Lalnunsanga Khawlhring, Divisional Forest Officer, Mamit Division/ Secretary, District Level Green Mizoram Committee chuan report pein Mamit District-ah kum 1999 khan thing tiak 1054 phunin Green Mizoram Day hi hman tan a ni a. Kum 2017 thlenga thing tiak phun tawh zat hi 98342 a ni. Thing tiakte hi khawpui chhung hmun remchanglai leh Mamit to Bawngva road, Dampui road leh Bairabi road-ah te phun thin a ni a. Thingtiak phunte hi 67% nung anga ngaih a ni a ti.

Vawiin Green Mizoram Day Mamita hmannaah hian District chhung khua, kangmei venna kawnga hnathawk tha thlanchhuahte hnenah District Level Fire Prevention Award hlan an ni a. Pakhatna hi Kawrthah North niin pahnihna Rulpuihlim leh pathumna Kawnmawi khuate an ni a. Lawmman pakhatna hian chawimawina thuziak leh pawisa fai Rs 50000/- keng telin pahnihnain chawimawina thuziak leh Rs 30000/- leh pathumna hian chawimawina thuziak leh Rs 20000/- an dawng bawk a ni. Hei bakah hian Green Mizoram Award, 2018 chu thing phun tam Pi Lalrokimi Sailo, W.Serzawl hnenah hlan a ni bawk.

Vawiin Green Mizoram Day pual hian Pu Bhupesh Chaudhary, District Bawrhsap Mamit, Pu Devesh Kumar Mahla, SP Mamit leh Dr. Zothankhuma Chhakchhuak, President Mamit Officers' Club- te chuan DC Office Complex-ah thingtiak an phun a ni.

Kumin Green Mizoram Day thupui atan hian "Thing phun belh la, a awmsa humhalh rawh" tih hman a ni a. Mamit to Bairabi road-ah Mamit khawpui chhunga Sorkar Department hrang hrang, tlawmngai pawl hruaitute leh khawtlang hruaitute'n thing an phun a ni.