Vawiin chawhma dar 10: 00 am ah khan Serchhip Sport Complex sak mek hmunah Serchhip District Lelvel Committee on Green Mizoram huaihawtin Green Mizoram Day, 2018 hmanna leh thingphun hnatlang neih a ni a. Thing 550 phun a ni.

Green Mizoram Day, 2018 hawnna inkhawm tawi hi Sport Complex sak mek kawngah, ruahsur hnuaiah buatsaih niin Pu Lallianzuala, DFO Thenzawl Division leh Serchhip District Level Green Mizoram Committee Member Secretary ni bawk chuan a kaihruaia. Green Mizoram Day hi kum 1999 atanga hman tan a nih tawh thu leh Serchhip District ah he ni denchhena thing 2.5 lakh phun a nih tawh thu te, a phun nung tha ber pawl District a nih mek thute report a pe a. Kumina Kang mei laka inveng tha District inelnaah Serchhip District chuan lawmman pathumna (3^rd Place) a lak thu sawiin a kaihhruaiin Serchhip District chhunga khua, kangmei laka ram veng thate hnenah lawmman sem niin Pi Sangchhin Chinzah, DC Serchhip chuan lawmman a hlan a ni. Lawmman dawngtute chu; pakhatna Leng Citation leh pawisa fai Rs. 50000, pahnihna N. Mualcheng, Citation leh pawisa fai Rs. 30000 leh pathumna Chhingchhip Mualpui, Citation leh pawisa fai Rs. 20000 te hlan an ni.

He hunah hian Pi Sangchhin Chinzah, DC Serchhip leh District Level Green Mizoram Committee Chairman ni bawk chuan thusawiin; ruahsur chu thing phunni atana khaw tha a nih thu sawiin vawiina thing phun zawng zawngte tan damchhuah theihna a san thu a sawi a. A phuntute uluk taka phuna, nung ngei tur leh puitling ngei tura enkawl a tul thu sawiin, thingphun hnatlang tura kal zawng zawngte chungah lawmthu sawi pahin thahnem ngai turin a ngen a ni.

Thing phun tan a nih hmain Environment, Forest & Climate Change Department mithiamten thing phun dan tur inhrilhhriatna hun an hmang a, chumi hnuah Sport Complex sak mek ramah leh Serchhip Tarpi tlang pang, leimin duhna hmun leh ram bua tawh tak maia thing phun turin an thawk chhuak a. Sport Complex ramah thing 500, Tarpi tlangah thing 55 an phun a ni. Vawiina thingphun hnatlang tura thawkchhuak te hi sawrkar Department hrang hrang atanga thlan bik mi 5 theuh te an ni a. Thingphunte hi an damchhuah ngei theih nan Department tinten chan insemin an enkawl zui vek dawn a ni.