742/2024-2025

Mamit 11th June, 2024 : Ramchhung hmundangte rualin vawiin khan Green Mizoram Day -2024 hawnna hun Nagar Van Yojona, Mamit-ah hman a ni a. Pu V.L Remliana, Chairman, District Level Committee On Green Mizoram, District Bawrhsap ni bawk chuan hawnna hun a hmang.

Pu V.L Remliana chuan Green Mizoram Day-ah thing uar takin kan phun thin a, kan thingphunte a nung ngei tur a ni tih chu vawiin nia thingphun tur te'n kan rilruah kan vawng tur a ni a ti, kan khawvelte a lum chho zel a, hemi veng tur hian tihtur tam tak kan nei a ni tih inhria ila, tunlaiah motor atanga kan bawlhlawh paih dan hi inenfiah ila, motor changkang taka chuang chunga kawngsira kan thil eina, plastic bottle paih leh mai mai kan awm thin a, hei hi a thalo-in a changkanglo a ni. Sik leh sa siam tha leh tur leh kan tu leh fate tana chenna tlak ram siam turin thingphun i uar deuh deuh ang u tiin Green Mizoram Day thingphuntute a chah a ni.

Pu C. Lalrinmuana, DFO& Member Secretary DLCGM-in report a pek danin Mamit District chhunga Green Mizoram Day hman tan kum 1999 atanga kumin 2023 thleng hian thingtiak 117540 phun a ni tawh a, Mamit District hian District tithate hnena hlan thin State Level Fire Prevention Award 2014 atang khan pakhatna, pahnihna leh pathumna dinhmunte a lo hauh ve tawh a, kumin 2024 hian State Level Award lawmman pathumna  Mamit District-in kan dawn thu a tarlang bawk.

Vawiin vek hian Mamit District chhunga kangmei vengtha thlanchhuah pakhatna Kanghmun pahnihna Darlung leh pathumna Tuidam te hnena lawmman pawisa fai leh chawimawina thuziak Pu V.L. Remliana, Chairman DLCGM/District Bawrhsap chuan a hlan bawk a ni.Lawmman pakhatna hian pawisa fai Rs. 50,000/- pahnihna Rs. 30,000/- leh pathumna Rs. 20,000/- a keng tel a ni.

Green Mizoram Day hawnna hun hi Pu Vanlalchhuanga Chhangte, President Sub Hqrs. YMA chuan kaihruaiin Dr. MS Dawngliana Hnamte, Principal GMC chuan lawmthusawina a nei bawk.

Kumin Green Mizoram Day thupuiah hian "I nunna atan thingphun rawh" (plant trees for your life) tih chu hman a ni a, Green Mizoram Day hawnna hun hman zawh hian Mamit khawpui chhunga Sawrkar Department, Tlawmngaipawl aiawh leh khawtlang hruaitu aiawhte chuan JNV Campus-ah thingtiak 150 an phun a ni. Nagar Van Yojona-ah hian  Chairman, DLCGM leh midang ruat bik te'n thing an phun bawk a ni.

Vawiin vek hian nikum 2023 Green Mizoram Day-a Darlak Road-a thingtiak phunte samfaia hnatlanna neih zui nghal a ni bawk.