741/2024-2025

Hnahthial the 11th June 2024: District Level Committee on Green Mizoram, Hnahthial District buatsaihin vawiin khan Vawkpui Lutar, Hnahthial-ah Green Mizoram Day 2024 pualin hun buatsaih a ni a, District Bawrhsap Pu Chuauhnuna, District Level Committee on Green Mizoram Chairman ni bawk chuan Khuallian niin a hmanpui a, Hnahthial khaw chhunga Sawrkar Department hrang hrangte bakah zirlai naupangte, tlawmngai pawl hrang hrangte leh chanchinthar thehdarhtute an tel.

Khuallian Pu Chuauhnuna chuan Green Mizoram Day lawmna puala thawk chhuak zawng zawngte chu chibai a buk a, a lawmna puala thing phun tura ruahman a ni chu lawmawm a tih thu a sawi. District Bawrhsap chuan mihringin tul lova thing leh mau, ramngaw leh nungchate kan tih chereu nasat avangin sik leh sa a danglam chho zel a ti a, khawlum chuan kumtinin zual lam a pan zel a ni tiin runthlak a tih thu a tarlang.

Sawrkar in Green Mizoram Day puala hun a buatsaih chhan chu thing phun satliah tur nilovin, mipui rilru leh ngaituahnaah thingphun pawimawh zia ‘awareness’ tuh a ni a ti a, ramngaw, thing leh mau te dimdawi nachang hria a, ngaihhlut an hlawh zual zel nan leh thangthar lo awm zel tur te tana ram nuam leh chhenfakawm hnutchhiah a nih theih nana buatsaih a ni, a ti bawk. Pu Chuauhnuna chuan kalkhawmte chu an thing tiak phunte ngaihsak zui zel turin a chah a, ram nuam leh mawi siam turin duat taka enkawl zui theuh turin a sawm bawk.

Pu Vanlalzarzoliana, RO Hnahthial leh Member Secretary, District Level Committee on Green Mizoram chuan vawiin hun hi kaihhruiin kum hmasa lama Green Mizoram Day lo hman tawn dan report tawi a pe a, Pu F Zosangliana, MJA Hnahthial President chuan lawmthu sawiin hun tawp a khar. Kumina Green Mizoram Day thupui chu ‘I Nunna atan thing phun rawh' tih a ni. Hnahthiala Green Mizoram Day puala hun hi session hniha then niin chhawng khatnaah hawnna hun tawi hman a ni a, chhawng hnihnaah Hnahthial District-a Department hrang hrang te, tlawmngai pawl hrang hrangte, chanchinthar thehdarhtute leh zirlai naupang ten EF& CC Department remruatna in thing tiak an phun theuh a ni. Thing tiak phunna hmun hi Block 6 a then a ni a, Vawkpui Lutar atanga Thiltlang khaw dai thlengin thing tiak hrang hrang 290 phun a ni.