740/2024-2025

Mamit 11th June, 2024 : Central YMA leh Samagra Shiksha Mizoram te'n Mizoram zirna hmasawnna tur atana thawhhona tur MOU an lo ziah angin Mamit District-ah pawh Vidyanjali (School Volunteer Programme) chungchangah District Level Orientation Programme BRC Hall, Mamit-ah nimin khan hman a ni.

Pu Laldingliana DEO/DPC Mamit, Mamit Sub Hqrs. YMA President Pu Vanlalchhuanga Chhangte bakah Secretary Pu H.Lalnunfela te'n thu sawiin State Level-a YMA leh Samagra Shiksha thawhhona MOU chu theihtawpa tihhlawhtlin zel an tum thu leh khawtlang mipuite nen zirna lama hmasawn tura tanrual a tul thu an sawi.

Vidyanjali hi school mamawhte, a hmanrua (kind) emaw thil tihsak (service) hmang emaw-a community/individual te'n an thawh (contribute)-na tur programme a ni a. Vidyanjali hlawhtlin theihna tura YMA leh Samagra Shiksha lam thawh dun dan tur ruahmanna duan lawk angte leh Vidyanjali Portal hman dan tur chipchiar takin Pu H.Lalrosanga, Dy.DPC & District Nodal Officer chuan Power Point Presentation hmangin zirtirna a pe a. YMA-te nen thawhhona tha leh midangte tana entawntlak taka ke pen ho zel a beisei thu a sawi bawk.

He hunah hian Sub Hqrs.YMA hruaitute leh branch hrang hrang aṭangin mi 30 chuang an tel bakah Online mode-in District chhunga YMA Branch hrang hranga mi 42 te'n he programme hi an lo join bawk.