949/2026-2027 

Dated : Mamit the 11th of June, 2026 : Vawiin khan LAD Park Mamitah Green Mizoram Day-2026 chu 'Thing hi rangkachak anga hlu, nunna tinreng bul a ni' tih thupuia hmangin hman a ni a. Pu Suvigya S. Chandra, Chairman, Mamit District Level on Green Mizoram/District Bawrhsap chuan he hun hi a hmanpui.

District Bawrhsap chuan kalkhawmte Green Mizoram Day - 2026 duhsakna chibai bukin, Mizoram boruak nawmna ber chu kan thing hring mawi tak tak te hi a ni a, boruak thinghlim min petu kan thingphunte humhalh a, phun belh zel chu kan tihtur niin, khawthlang hruaitu, tlawmngaipawl leh Department-a thawktute'n Green Mizoram Day-a thing kan phun thin chu tha a tih thu leh thingphunte nung ngei tura enkawl zui kawngah theihtawp kan chhuah tlan a tul hle a ni a ti bawk.

Vawiin Green Mizoram Day hmanna hunah hian kumin chhunga Mamit District chhung kangmei veng tha khua Best performing villages in Fire Prevention, 2026 lawmman latute hnenah chawimawina thuziak leh pawisa fai hlan niin pakhatna Mamit Bazar veng Rs. 75,000/- pahnihna New W. Phaileng 50,000/- pathumna Marpara Mizo veng, Rs. 40,000/- hlan an ni a, Hei bakah hian Consolation Prize Chungtlang, Nghalchawm leh S. Sabual khuate hnenah chawimawina thuziak leh pawisa fai Rs. 10,000/- theuh hlan an ni bawk.

Kumina Green Mizoram Day hmanna hmunah hian Pu Suvigya S. Chandra, District Bawrhsap, Pi Carolyn L. B Khiangte, Addl DC leh Pu Solai Azyu DFO te chuan thingtiak an phun a ni.

Green Mizoram Day - 2026 hawnna hun tawi hi Solai Azyu, Member Secretary/DFO, Mamit chuan kaihruaiin kum hmasa lama thingphun tawhte samfai nan leh a nunglo thlaknana hun hman niin thingtiak 150 vel phun belh a ni a, Zirna In, Department, NGO leh mimal thingphun duh tan Ni 10.06.2026 atang DFO, Office Mamit-ah thingtiak lak theiha ruahmanna siam a ni bawk.