948/2026-2027

Dated Aizawl the 11th June 2026: Vawiin chawhma khan Youth Recreation Centre, Falkland-ah Environment, Forest & Climate Change (EF&CC) changtu Minister Pu Lalthansanga chuan khuallian niin Green Mizoram Day 2026 lawmna a hmanpui a. EF&CC Deptt. Principal Secretary Pu Sudhir Kumar chu khual zahawm a ni.

Minister chuan thu sawiin Mizoramin sik leh sa nuam tak, ram dang mite awh em em a neih theih chhan chu ramngaw leh thing kan neih that vang a ni a ti a. Thingkung leh ramngaw tangkaina leh hlutna te kan hriat thar deuh deuh a tul thu sawiin, kan rama thingkungte hi venhim leh enkawl ngai an nih thu a sawi a. Minister chuan Green Mizoram Day hmangtute zawng zawng chu thawhpuiah sawmin ram nuam leh mawi zawk siam tura an theihtawp chhuah turin a sawm a ni.

Minister hian Kangmei Pumpelh tha lawmman (Fire Prevention Award) a sem a. Huang hrang hranga lawmman late chu hetiang hi an ni:

District inelna:
1. Lawngtlai district
2. Serchhip district
3. Aizawl district

Ram pum huap khaw inelna:
1. Leng
2. Rulkual
3. Muthi

Aizawl district chhung khaw inelna:
1. Muthi
2. Thiak
3. Sawleng

Consolation prize: Kepran, E.Phaileng, Hmuifang Tlang Fire Prevention Committee

Khual zahawm Pu Sudir Kumar-a chuan mihringte leh thilnung dangte tana thingkung hlutna chu chhut sen rual loh a ni a ti a. Mizoram pawhin hmasawnna tur tam tak a neih thu leh mipuite leh sawrkar inlungrual taka thawhho a pawimawh thu a sawi.

He hunah hian Pu Samson Thanruma DCF(HQ) in Green Mizoram chungchang report a pe a. Kum 1998 khan Green Aizawl Committee din niin, 1999 atang khan Green Mizoram Committee tih a lo ni ta a. Mizoram sawrkar chuan 2014 atang khan June 11 hi Green Mizoram Day atan a ruat ta a ni. Kum 2025 thleng khan thing tiak 17,79,503 phun niin thing tiak 29,74,318 sem a ni bawk.

Vawiin inkhawm hi Pu Rajeev Kumar Tiwari, Principal Chief Conservator of Forest chuan a kaihruai a. Kumin Green Mizoram Day thupui(theme) chu “Thing hi rangkachak anga hlu, Nunna tinreng bul a ni.” (Trees are green gold, The roots of all life) tih a ni. Pu Lalnunsanga Khawlhring, DFO Aizawl Forest Division in lawmthu sawiin hun a khar a. Inkhawm banah Youth Recreation Centre huam chhungah Minister leh Official-ten thing tiak an phun bawk a ni.