871/2022-2023

Mamit 10th June, 2022 : Vawiin khan ramchhung hmun dangte rualin Mamit Mualpui pengah Green Mizoram Day, 2022 hawnna hun hman a ni a, Pu Lalnunhlua, District Bawrhsap chuan khuallian niin he hun hi a hawng.

Khuallian chuan India ram mai ni lo, khawvel pumpuiah tuihna kam zel tihpun leh tuma hmalakna kalpui mek a ni a. Mithiamte chuan a kumtela tuihna tlem zel chu ramngaw kan tihchereu nasat vang anih thu an sawi a, hei vang hian kan tun dinhmun mekah ramngaw siam thar leh tura tan kan lak a tul a ni a ti. Green Mizoram Day thupui hrerenga kan thingphunte phun nun ngei tum tur leh a enkawl zui chu kan tih ngei ngei tur a nih thu a sawi bawk. 

Pi Jenny Sailo, DFO Mamit chuan report pein Green Mizoram Day hman tan Kum 1999 atangin Mamit District chhungah thingtiak 109977 phun tawh anih thu a tarlang a. Vawiina Sorkar Office hrang hrang leh NGO hrang hrangte thingphun zat hi 350 niin Green Mizoram Day, 2022 puala mimal, pawl leh a mamawh apiangte'n DFO Office Mamit atanga thingtiak phun tur an lak chhuah zat hi 623 ni tawhin thingtiak hi a duh leh mamawhte tan karleh Monday thleng DFO Office-ah lakchhuah theih a nih thu a sawi. 

Kumin Green Mizoram Day thupui hi "Thing phun la, Tuihna humhalh rawh" tih niin Mualpui peng atanga Aizawl road NH 44A kawngpui kamah thingtiak hi phun a ni. 

Vawiin Green Mizoram Day-ah hian Fire Prevention Week Puala Mamit District chhung Village Level-a Kangmei veng tha khua thlanchhuahte lawmman hlanna khuallian hian nei nghalin pakhatna Kawrtethawveng, Pahnihna Kawrthah North leh Pathumna New Mamit VC te an ni. Dampui, Rulpuihlim leh Khawrihnimte hnenah Consolation Prize Rs. 10,000/- theuh hlan an ni bawk. Lawmman pakhatna hian Chawimawina thuziak bakah Rs. 50,000/- a keng tela, pahnihna hian Rs. 30,000/- leh lawmman pathumna hian Rs. 20,000/- a keng tel a ni.

Vawiin Green Mizoram Day hawnna inkhawm hi Pu K. Lalmuankima, Honorary Wildlife Warden, Mamit District chuan kaihruaiin Pu F. Vanlalsawma, Range Officer chuan lawmthu sawina a nei bawk.