No.2426/2020-2020

Mamit 25th June, 2020 : Vawiin khan DC Conference Hall, Mamit-ah Dr. R. Lalthangliana, Health Minister chuan Dr. Lalrozama, IAS, Mamit District Bawrhsap hmalakna-a Ambulance dawn 4-te chu tlangzarhna leh hriselna lama thawktute kuta hlanna a nei a. Health Officials-te nen Meeting an nei nghal bawk.

Ambulance 4-te hi kan District, Aspirational District kan nih anga chawikan kan nih theih nan CSR Funding Rural Electrification Corporation Ltd. atanga dawn a ni a. Heng Ambulance lei nan hian Rs 26,13,504/- sen ral a ni.

Ambulance atan hian Maruti AC Eeco Van lei niin siam danglam a ni a. Driver thutna hmalam leh damlo phurhna inkar hi phui taka pindan niin tukverh kharphui theih siam a ni bawk. A hnungah hian damlo mutna (thlawn theih) awmin damlo buaipuitu mi pathum thut theihna seat a awm a. Ambulance hian Oxygen Cylinder a kawl bawk a ni. Ambulance-te hi CMO leh DMS kutah dah a ni phawt anga, a tul anga siam rem zui leh tura ruahman a ni a. Heng Ambulance-ah te hian COVID hrileng avanga damlo leh damlo pangngaite phurh pawlh an ni dawn lo a ni.

Health Minister ho hian DC Conference Hall, Mamit-ah Dr. Lalrozama District Bawrhsap kaihhruainain thutkhawm zui a ni a. Mamit District chhunga Medical Officer-te chuan an bial chhunga an harsatna leh an mamawh hrang hrangte Minister hnenah hian an thlen a. Pu J. Hrangdailova, Jt. VC Chairman chuan khawtlang aiawha thu sawiin Hospital khum 100 awmna tur chu a rang thei ang bera hmalaksak turin Health Minister hi a ngen bawk a ni.

Dr Lalthangliana, Health Minister chuan Mamit District hriselna lama hmasawnna tura rawtna hrang hrangte chu ngaihthlaksakin India ram District 117 zinga Mamit District Vohbik District kan ni chu kan hman tangkai thiam a, tha thlah lova kan beih tang tang a tul thu a sawi a. DC-ah Medical Doctor Mamit District-in kan nei chu kan vanneih thu a sawi bawk. Mamit District-in khum 100 awm theihna tur Hospital kan neih theihna tur hi Power Finance Corporation atanga kan dawn anih thu sawiin a senso atan Vaibelchhe 17 ruahman anih angin sak thuai a nih dawn thu a sawi.

Minister chuan Auxiliary Nursing Midwife Hostel pawh sakna tura ruahmanna awm vek tawh anih thu sawiin Reiek PHC Building pawh NABARD sum hmanga renovate turin ruahmanna kalpui mek anih thu a sawi bawk.

Health Minister chuan Mamit District chu ramri thui tak nei, hrileng dona kawngah pawh hna hautak tak nei in ni chungin DLTF leh VLTF-te hmalakna leh hnathawh that vangin mipui mimirah tun thlengin hri a la darh lova, DLTF leh VLTF te'n tlawmngaihna, hmangaihna leh tumruhna nen an beih tang tangna chu fakawm a tih thu sawiin hrileng dona kawnga thawktu zawng zawngte chungah lawmthu a sawi. Hrileng avanga damlo enkawl mekte chu tawngkam tha taka lo dawngsawng thin tur leh phur leh thatho taka enkawl zel turin Medical Officials kalkhawmte chu a chah bawk a ni.

Pu Lalrintluanga, Dy. Govt. Chief Whip pawhin thu sawiin Medical Officer kalkhawmte chu an bial mipuite hriselna endik tura an bial chhung khuate tlawh kual taima turin a chah a. Er. H. Lalzirliana, Mamit bialtu MLA pawhin thu a sawi bakah CMO leh DMS-te hman tur PPE, N95 Mask leh Glove thahnem tak a hlan nghal bawk a ni.

Pu Beitlotha Nohro, Aspirational District, Nodal Officer pawhin Mamit District hriselna lama kan dinhmun tlangpui Powerpoint presentation hmangin kalkhawmte a entir bawk.

Minister hian Mamit District Hospital, khum 100 awmna tur Building thar leh Auxiliary Nurse Midwife (ANM) Building sakna tur hmunhmate a tlawh nghal bawk.

Minister hian Ambulance 4-te hi vailiam nghalin REC Ltd.CSR Health Project Programme-ah hian Mamit District chhunga hriselna lama thawktu, CMO, DMS leh Medical Officers-te, Principal, Govt. Mamit College, DLAO, DVO, DUDO, Khawtlang hruaitu aiawh leh tlawmngai pawl aiawhte bakah thutharthehdarhtute an tel a ni.