No.2425/2020-2020

Lawngtlai, Nikir thla ni 25, 2020: Vawiin khan Lawngtlai Bawrhsap Dr Andrew H. Vanlaldika, MCS chuan a pisaah Lawngtlaia thu thar theh darhtute kawmin, Lawngtlai District-a COVID-19 positive case 8, Covid Care Centre (CCC)-a enkawl mekte chu an swab sample endik nawnnaah an negative vek thu a sawi.

Vawiina thu thar theh darhtute nena inkawmnaah hian District Administration, Police leh Health Department hotute telin, COVID-19 kaihhnawiha Lawngtlai District dinhmun hrang hrang tar lan a ni a. Bawrhsap chuan Lawngtlaia COVID-19 positive mi 8 (mipa 6 leh hmeichhia 2), Lawngtlai CCC-a enkawl mekte swab sample chu nizan khan Zoram Medical College (ZMC)-ah test nawn a nih thu leh an result a negative vek thu a sawi a. Harsatna dang a awm loh chuan, sawrkar kaihhruaina ang leh doctor-te thu tlukna angin naktukah damdawi in atanga chhuahtir an nih tur thu leh, negative tawh mah se, damdawi in an chhuahsan hma chu COVID-19 vei tawh lo, dam chhuak (recover)-a chhiar theih an la nih rih loh thu a sawi.

Bawrhsap chuan khung hrante swab sample rang taka la a, RT-PCR test tura ZMC-a an thawn zung zung avangin Lawngtlai District medical team a fak a. Hei vang hian sample thawn tawh zawng zawng 784 chu a result hriat vek tawh niin, tun dinhmunah result nghah lai a awm tawh rih lo a ni, a ti.

Chief Medical Officer Dr Lalthlamuana chuan sample test chungchangah an thawn ang ang result hriat kim a ni chu lawmawm a tih thu a sawi a. Hetih lai hian June ni 19 hnu lama lo thlengte swab sample chu vawiin atangin medical team-in an lak chhunzawm tur thu leh tun dinhmunah sample lak hmabak 48 a la awm thu a sawi.

Thu thar theh darhtute zawhna chhangin, District Medical Superintendent Dr Zothanpari Chhakchhuak chuan COVID-19 positive mi pariat an enkawlte zinga mi pathumah nasa vak lovin natna a lang chhuak hman tih a sawi a. Tunah chuan an dinhmun a tha vek tawh tih sawiin, damdawi in an chhuahsan hnuah pawh mahni in lamah fimkhur taka inkhung hrang leh tura an tih thu a tar lang bawk.

District medical hotute chuan sawrkar kalphung ding lai ang chuan damlote hi an negative hnuah ni thum (3) chhung thlithlai zui a, chumi hnuah harsatna an neih loh chuan damdawi in atanga chhuahtir chauh tur an nih thu sawiin, tuna damlo result negative tate hi an sample lakna ni 5 a liam tawh avang leh chumi chhungin anmahniah natna lan chhuahna leh insawiselna an neih loh avangin naktuka chhuahtir tum an nih thu an sawi a ni.

Vawiina thu thar theh darhtute nena inkawmnaah hian COVID-19 vanga damlo dam chhuakte emaw, quarantine centre atanga chhuakte emaw chu mipuiin lo thinhrik a, lo en hran tur a nih loh thu sawi chhuah niin, mi thiamte'n him china an ngaihte chauh an chhuahtir thin thu tar lan a ni a. District thuneitute chuan mipuite chu mi dang tana harsatna siam leh an rilru hliam zawnga khawsa lo va, sawrkarin fimkhurna tur a tihte tha taka zawm zel turin an chah a ni.